A USC acolle unha xornada sobre patentes de algoritmos e software libre

Mañá martes, día 27 de setembro, a Facultade de Matemáticas da Universidade de Santiago de Compostela, vai acoller un seminario sobre patentes impartido por Javier del Ser Lorente e Sergio Gil-López, de Tecnalia Research and Innovation, no que se presentará o proceso de patentabilidade dun algoritmo e no que se exporán distintos exemplos de patentes algorítmicas dadas.
O obradoiro, que vai dirixido a investigadores da Rede e-Math e a empresas tecnolóxicas, acollerá, asemade, relatorios sobre propiedade industrial e intelectual, patentes de software libre, patentes de algoritmos en Spacenet... así como o caso práctico da empresa Tecnalia, con experiencia en patentabilidade de algoritmos.
As persoas interesadas en asistir ao evento poden facelo de maneira presencial ou virtual, a través de videoconferencia, previo rexistro na web do CESGA.
Trátase do Seminario sobre patentabilidade de Algoritmos e Invencións Implementadas en Ordenador, e dará comezo a partir das 10:00 horas na Aula de videoconferencia da Facultade de Matemáticas da USC.