A UDC lanza web para convidar á xuventude a percorrer o camiño da ciencia e a tecnoloxía
mércores, 27 de marzo do 2019
Temos
nova web sobre educación científico-tecnolóxica e sobre as
vantaxes de iniciar unha andaina educativa e profesional ligada á
investigación, o coñecemento avanzado e o desenvolvemento. A nova
páxina, STEMbach, vén da
man dunha das institucións galegas que envorca máis esforzos en
incidir en estimular as vocacións e as capacidades da xuventude en
eidos como a informática, a robótica, a eSaúde, a Industria 4.0 ou
a sustentabilidade enerxética: a Universidade da Coruña.
O
espazo en liña vai adicado ao novo Bacharelato de Excelencia en
Ciencias e Tecnoloxía, ou STEMbach, creado ao abeiro da
Estratexia galega para a educación dixital, Edudixital 2020, e que
se oferta por primeira vez neste curso nun total de quince centros
educativos galegos.
Na
páxina, ademais de información de interese sobre a nova liña
formativa pre-universitaria, os titores e o alumnado dos centros
educativos poden consultar os proxectos de investigación que se
ofrecen desde a Universidade da Coruña: máis de 50 propostas
realizadas por once facultades e escolas diferentes situadas tanto no
Campus da Coruña como no Campus de Ferrol. Os proxectos, que poden
realizarse de maneira individual ou colectiva e contarán cunha
posterior defensa pública, están aliñados cos tres campus de
especialización da UDC, o Campus Innova, o Campus Sustentabilidade e
o Campus Industrial, e serán co-dirixidos por unha persoa docente
pertencente á Universidade da Coruña.
Segundo
se engade dende os ditos campus, “o alumnado galego matriculado
neste bacharelato poderá desenvolver o seu proxecto de investigación
na UDC sobre temas tan diversos e interesantes como o comportamento
mecánico do aceiro a baixas temperaturas, a mellora da mobilidade
viaria das cidades, os robots autónomos, a impresión 3D no deseño
industrial, a radioactividade ambiental, a evolución da paisaxe e do
clima, o estudo do cariotipo humano, a procura de novos compostos
antitumorais, a análise da seguridade informática da rede de datos
dun centro de secundaria, ou as tecnoloxías lingüísticas, entre
outras liñas de traballo.
Outro
dos obxectivos da web é facilitar a coordinación entre a
Universidade da Coruña e os quince centros galegos que imparten o
STEMbach co fin de “organizar de maneira conxunta visitas,
xornadas, obradoiros, seminarios ou calquera outra actividade
complementaria de formación”.