A UDC acolle a segunda edición do Campus Doc
xoves, 29 de abril do 2010
A Facultade de Informática da Universidade da Coruña vai dar acollida,
durante os vindeiros días, á segunda edición do Campus Doc, un peculiar
festival audiovisual no que, entre outras cousas, se levarán a cabo proxeccións
de filmes, documentais, musicais... así como relatorios da man de diversos
profesionais do audiovisual galego.
No festival, que deu comezo onte á tarde coa proxección dos films Buena Vista Social Club e Glastonbury, participarán persoeiros da
talla de Antón Reixa, músico, escritor e cineasta, e David Castro, coordinador
da Aula de Cinema e Imaxe da UDC.
Ás 16:30 horas desta mesma tarde, Castro ofrecerá a charla Os documentais musicais, á que seguirán
a proxección de This is Spinal Tap
(Rob Reiner, 1984) e de No Distance Left
To Run (Dylan Southern e Will Lovelace, 2010).
As proxección retomaranse o vindeiro día 6 de maio ás 16:00 horas, cando as
persoas asistentes ás xornadas poderán ver Mirror
Noir (Vincent Moon e Vincent Morisset, 2009), para logo asistir ao
relatorio de Antón Reixa, que leva por título Música e Audiovisual en Galiza e Palestina.
Posteriormente, ás 19:30 horas será a quenda para a proxección de The Devil And Daniel Johnston (Jeff
Feuerzeig, 2005).
Finalmente, o
xoves, 13 de maio, ás 17:30 horas poderanse ver Scratch (Doug Pray, 2001) e Michael
Jackson’s This Is It (Kenny Ortega, 2009), ás 19:30 horas.