A Tecnópole renderá homenaxe ás 300 empresas ás que deu acubillo
mércores, 18 de outubro do 2017
- Acto de presentación da memoria do parque celebrado o pasado mes de xuño
A Tecnópole
de
San Cibrao das Viñas (Ourense)
celebra este
venres
os seus 25 anos de traxectoria. E farao contando coa
participación das empresas, os centros de coñecemento e outras
entidades de innovación que tiveron a súa sede alí ao longo deste
cuarto de século. A xornada incluirá unha serie de actividades que
se estenderán ata primeira hora da tarde. A idea básica é render
homenaxe ás 300 firmas ás que xa deu acubillo a Tecnópole ao longo
da súa frutífera andaina.
Segundo nos contan fontes
do propio Parque Tecnolóxico de Galicia, os asistentes terán
ocasión de coñecer as últimas tendencias en neuromárketing
de man do mago Kiko Pastur e recibirán consellos do experto en
adestramento Daniel Álvarez Lamas para crear un equipo de
emprendedores internos nas empresas.
Tamén haberá unha mesa
redonda na que se tratarán cuestións como os desafíos da
innovación futura, a Industria 4.0 ou a transición enerxética, da
man de representantes de COASA, EGATEL, Coren CTI, Conexiona, Novelle
y Fernández Ingeniería e esEnRed.
Para rematar, os
asistentes terán ocasión de compartir contactos e experiencias, co
obxectivo de estreitar lazos entre as empresas e centros de
coñecemento que formaron e forman parte da traxectoria do Parque
Tecnolóxico de Galicia.
Como lembraremos, boa
parte das celebracións dos 25 anos da Tecnópole xa se están a
desenvolver ao longo de 2017. Entre as máis relevantes,
informativamente falando, situouse
o encontro celebrado en xuño co obxectivo de presentar a memoria
global de actividade do parque. Segundo se fixo saber daquela, o
recinto acolleu ao longo da súa historia un total de 284 empresas,
centros tecnolóxicos e entidades relacionadas coa innovación.
Tamén
se destacou no almorzo que a sociedade xestora participou en 28
proxectos de I+D+i e promoveu a posta en marcha de tres instalacións
científico-tecnolóxicas ao servizo de todo o tecido empresarial
galego: un laboratorio de biotecnoloxía, un centro de tecnoloxías
médicas avanzadas e un centro experimental de enerxías renovábeis.
Ademais, organizou dúas conferencias internacionais de parques
tecnolóxicos e unha chea de actividades formativas e eventos
centrados no intercambio de coñecemento.