A Ribeira Sacra acolle un bar-tenda automatizado
luns, 24 de outubro do 2022
A
Ribeira Sacra (O Carballo, Pantón) acolleu este venres 21 a
presentación dun bar-tenda automatizado. Trátase de La Moderna,
un establecemento que xorde dunha fonda transformación tecnolóxica
do concepto de tenda rural (pero sen deixar o formato desprovisto da
súa esencia orixinal) e que irrompe en Galicia co obxectivo
primordial de “satisfacer as necesidades da poboación das aldeas e
vilas pequenas e os seus visitantes, que quedaron descubertas por
falta de continuidade xeracional”.
La
Moderna, engaden os seus creadores, unifica o vello concepto de tenda
de ultramarinos e adáptao ao século XXI utilizando as novos
tecnoloxías de control e automatización, dando como resultado “un
paso máis cara a un mundo rural 4.0”.
Este
venres 21 acompañouse a presentación dunha demostración arredor do
funcionamento do sistema de control e automatización. A cita foi no
Ecolagar O Barqueiro, á beira do encoro dos Peares, complexo
turístico rural que habilitou un local social utilizando a
tecnoloxía de La Moderna.
O
director de mercadotecnia de Ecolagar
O Barqueiro, Chris Miller, explicou previamente que a orixe deste
proxecto cómpre rastrexala cando os seus promotores caeron na conta
“de que no ámbito rural foron pechando este tipo de
establecementos”, ultramarinos tradicionais de produtos e servizos
variados, diversos, que eran “como o centro das aldeas ou
parroquias”. Para reinterpretar ese concepto clásico dos
ultramarinos, "o que se fixo foi utilizar novas tecnoloxías, o
que nos permitiu adaptar este tipo de establecemento ao século XXI",
engadiu Miller.
No
acto participaron Jose Antonio Losas, representante de La Moderna,
Luis Ángel Martín, xestor do Ecolagar O Barqueiro e José Luis
Álvarez, alcalde de Pantón.
No
transcurso da cita desenvolveuse unha demostración do funcionamento
do sistema de automatización realizada por Martín; “Este sistema
permítenos ofrecer aos nosos hóspedes servizos de alimentación que
doutra forma seríanos imposible. Ademais, ao ser aberto aos veciños,
permítenos dinamizar a contorna achegando un centro de socialización
que antes non había.
José
Antonio Losas engadiu que “a tecnoloxía de La Moderna está
pensada para que calquera persoa, con independencia da súa idade,
poida utilizala sen ningún problema. Desta maneira eliminamos a
barreira tecnolóxica que ás veces impide o seu uso a persoas de
maior idade.
Tamén
participou José Luis Álvarez, rexedor de Pantón, que se animou a
usar o novo equipamento: “É tan fácil de usar que valería para
os centros sociais do concello, posto que por falta de persoal non
dispomos dese servizo”.