A Radio Galega dará conta dos avances da Deputación de Pontevedra no eido das TIC
venres, 8 de novembro do 2013
O programa Banda Ancha da
Radio Galega, galardoado cun
Premio INNOVA-G, continúa co seu labor de difusión da tecnoloxía en
Galicia, polo que este sábado a partires das 15:05 horas realizará un repaso da
actualidade da semana, grazas á colaboración de Código Cero, aproveitando a ocasión
para conversar con Amancio Varela, xefe do Servizo de Novas Tecnoloxías da
Deputación de Pontevedra, quen fará un repaso dos avances en materia
tecnolóxica que está a desenvolver o organismo provincial de cara a ofrecer uns
mellores servizos aos cidadáns e avanzar no eido da eAdministración.
Lembremos que nos últimos anos a Deputación de Pontevedra puxo en marcha o
proxecto eDepo, para o que tivo que dotarse dunha importante infraestrutura
tecnolóxica dende a que achegar os seus servizos electrónicos; tamén construíu
novos centros de proceso de datos; e incluso encabezaron iniciativas como o
proxecto Repoblar para achegar o acceso á Rede ao rural pontevedrés.
No programa radiofónico desta semana tamén se conversará con Ángela Milla,
responsable de Digital Business de AXA España, para dar a coñecer as novas
aplicacións móbiles da súa compañía; saudarase a Daniel Moreiras, un dos
responsables dun vídeo que
está a converterse en todo un fenómeno viral na Rede (superando xa as
100.000 reproducións en YouTube); e pechará o programa Pablo Grandío, de Vandal.net, dando conta dalgunhas novidades
do sector dos videoxogos.
- Amancio Varela conversando con Xosé María Fernández Pazos ante os micrófonos da Radio Galega