A Policía Local de Cedeira insta a YouTube a que retire un vídeo
martes, 23 de decembro do 2008
Unha veciña da localidade coruñesa de Cedeira acudiu nos
pasados días ás instalacións da Policía Local do seu pobo para denunciar a
publicación dun vídeo en YouTube que terceiras persoas subiran para “burlarse da súa filla”.
A nova vén de ser publicada polo xornal galego La Voz
de Galicia, onde se indica que as imaxes foran capturadas nun bar da
localidade “por un grupo de mozas sen
consentimento da súa filla”, a principal afectada deste suceso e
protagonista da devandita gravación.
Os axentes informaron a este xornal que este tipo de
gravacións supoñen un “presunto delito de
violación da intimidade persoal contra a honra” e instaron aos
administradores da popular web de descarga e visualización de vídeos en liña a
que o retiraran.
Segundo os encargados do caso, que lle remitiron un correo
electrónico aos responsables de YouTube para explicarlle o sucedido, o portal americano
retirou o polémico vídeo “de inmediato”,
aínda que a querella interposta pola veciña prosegue o seu curso nos tribunais.