A Plataforma polos Dereitos de Autor denuncia a apropiación sistemática na Rede das obras do xornalistas e fotógrafos
xoves, 26 de xuño do 2014
A
Plataforma polos Dereitos de Autor (PDA) emitiu esta semana un
comunicado dirixido a pór de relevo unha práctica en claro proceso
de proxección e de claras consecuencias negativas para xornalistas e
fotógrafos. Trátase da apropiación xeral e sistemática das obras
destes colectivos profesionais “ao abeiro de calquera soporte”.
Estes feitos, unidos ao uso cada vez máis estendido das redes e dos
dispositivos móbiles, fixo que a plataforma propuxese aos grupos
políticos varias emendas á Lei de Propiedade Intelectual, arestora
a debate no Parlamento. A xuízo do colectivo, os
dereitos dos xornalistas vulnéranse de xeito reiterado na Internet.
Segundo
engade a PDA hoxe en día as persoas que crean textos ou imaxes,
depositarios dos correspondentes dereitos, “non só teñen que
padecer uns prezos irrisorios polo
seu traballo ou colaboración nun medio de comunicación, pese a que
a empresa editora emprégao
nos soportes e medios do grupo ou fai asinar contratos leoninos á
forza, senón que tamén son vítimas do
roubo do seu traballo en
Internet”.
Deste
xeito, as organizacións que
integran
a PDA -Federación de Asociacións de Xornalistas de España (FAPE),
Foro de Organizacións de Xornalistas (FOP), do que fai parte o
Colexio Profesional de Xornalistas de Galicia, e os Colexios
Profesionais de Xornalistas de Andalucía, Castela e León e Murcia-
fan
público o seu
malestar “pola lamentábel
e frecuente actuación dalgúns medios de comunicación e dalgúns
xornalistas que usan imaxes, vídeos e textos, sen permiso, sen
ningún tipo de remuneración, vulnerando ademais as máis elementais
normas do Código Deontolóxico”. Lembran
tamén que “o feito de que
unha obra literaria ou gráfica apareza nalgunha web, blog ou redes
sociais da Rede non supón que se poida utilizar con impunidade,
senón que ten uns dereitos que non poden ser vulnerados”.
A
plataforma tamén salienta
“que os produtos intelectuais teñen un valor e deben
ser remunerados e que os dereitos de autor son irrenunciábeis”,
por iso é polo que presentou
xa varias emendas aos grupos
parlamentarios, entendendo que o proxecto de reforma non recolle
axeitadamente
os dereitos de autor dos xornalistas e dos fotoxornalistas, “malia
seren expresamente recoñecidos pola Comisión Europea”, explica.