A Oficina Acelera PEME do ITG pon o foco no metaverso, as tecnoloxías inmersivas e a sinatura biométrica
venres, 3 de novembro do 2023
O
Instituto Tecnolóxico de Galicia (ITG) levará a cabo ao longo do
mes de novembro un amplo programa de accións formativas no marco da
actividade desenvolvida pola súa Oficina Acelera PEME (Red.es), que
ten como obxectivo “contribuír a impulsar o crecemento e a
competitividade das pemes da Coruña”. Deste xeito, pequenas
empresas, autónomos e emprendedores poderán iniciarse en ámbitos
como o metaverso, as tecnoloxías inmersivas ou a sinatura biométrica
e as súas aplicacións empresariais, explican fontes do ITG.
As
accións formativas, de carácter gratuíto, terán “un carácter
eminentemente” práctico e serán impartidas en colaboración con
empresas e entidades como NTT DATA, Xoia, Duacode ou GaiásTech.
A
continuación compartimos o calendario formativo de novembro.
• 7 de novembro, ás 09.00h. Obradoiro Descobre Oportunidades de
Dixitalización para a túa Empresa. Impartirase tanto de forma
online como presencial e a modalidade presencial será nas
instalacións de Neurall, en rúa Enrique Mariñas Romero, 32 G, 3.º
(A Coruña).
• 9 de novembro, ás 10:00h. Obradoiro en liña Metaversos. Enfoque
opensource. Nesta sesión, deseñada para todos os públicos,
veranse exemplos de como o metaverso xa xera oportunidades de negocio
e valor engadido en sectores como a saúde ou educación. Este taller
formativo impartirase en colaboración con Centro GaiásTech.
• 9 de novembro, de 15:30h a 19:00h. Xornada #IndustriaExtendida.
Evento presencial organizado en colaboración con Xoia Extending
Reality no que se verán exemplos prácticos de tecnoloxías
inmersivas como a Realidade Aumentada e a Realidade Virtual, e que
contará coa participación de representantes de NTT DATA, Possible
Incorporated ou Texas Controls.
• 14 de novembro, ás 10:00h. Obradoiro online Potenciando o deseño
web para atraer e reter clientes, no que se dará conta da
importancia do deseño web centrado no usuario e o seu impacto nas
vendas e a fidelización de clientes. Impartido por Duacode.
• 21 de novembro, ás 10:00h. Obradoiro online Innovación en
Contratación: aplicación Práctica da Firma Biométrica e os
Formularios Intelixentes, impartido pola empresa Unayta.
Para
asistir a estes obradoiros é necesario inscribirse
previamente na web do ITG.
Oficina
Acelera PEME de ITG
A
Oficina Acelera PEME de ITG ofrece asesoramento gratuíto e
personalizado para a adquisición e incorporación das solucións
incluídas dentro do Kit Dixital, así como unha combinación de
actividades presenciais e híbridas para “chegar a un amplo
espectro de empresas e emprendedores, brindando oportunidades de
aprendizaxe e colaboración”.
Nos
seus primeiros dous anos de actividade, a Oficina levou a cabo 53
xornadas de dixitalización con máis de 1.900 rexistrados, atendeu
máis de 200 consultas e realizado un total de 56 diagnósticos
dixitais personalizados e un índice de satisfacción de 9,2 sobre
10. Nos próximos 24 meses ten previsto ampliar o impacto da súa
actividade no tecido empresarial da Coruña prestando 700 servizos de
transformación dixital para pemes, autónomos e emprendedores da
Coruña.