A Mostra de Cinema Periférico da Coruña acada importantes cifras de asistencia, in situ e en liña
luns, 10 de xuño do 2013
Os
días pasados celebrouse na nosa terra un certame audiovisual, ben
innovador, que tódolos seareiros debéramos ter na axenda: a Mostra
de Cinema Periférico da Coruña (S8), que chegou á súa cuarta
edición batendo récords de seguimento en liña e offline:
acubillando máis de 8.000 participantes, centos de internautas
seguindo parte das actividades e un volume alto de películas a
proxectar en formatos pre-dixitais e anti-corporativos. De feito, o
85% das moitas pezas proxectadas viñan en formatos analóxicos de
variado tamaño e pretensións (Super 8, 8mm, 16mm e 35mm). Esta
cuarta convocatoria do festival arrancou cunha homenaxe a un dos
grandes creadores do cinema tal e como o coñecemos, Georges Méliès,
a través da presenza na cidade dos seus descendentes Marie-Hélène
e Lawrence Lehérissey.
Nai e
fillo, bisnieta e tataraneto do mago que converteu o cinematógrafo
en cinema, ofreceron un programa no que puideron verse até 16
películas, todas en 35mm, entre as cales hai títulos tan senlleiros
como O home da cabeza de goma, Viaxe á Lúa, Barba Azul, A bruxa
mala ou O asombroso
abano humano, entre outros. Amais da presenza de creadores como
Ben Russell, Ben Rivers, Claudio Caldini e Miguel Mariño, que
amosaron parte da súa obra, desenvolveuse unha sección
complementaria, O Observatorio, que se saldou na sala de
prensa da Fundación Novacaixagalicia “cun alto nivel de
participación” tanto de público como de profesionais da
crítica e do sector audiovisual, informa a organización de S8, que
tamén salienta os máis de 800 internautas que puideron seguir en
vivo as sesións de contidos (dúas xornadas de O Observatorio)
na canle de streaming habilitada pola organización do S8.
Por
certo que o certame continúa coas súas actividades os días 10 e 11
de xuño co Obradoiro de Cinema Expandido que Claudio Caldini
impartirá no Museo de Arte Contemporánea Gas Natural Fenosa.
Caldini desenvolverá por primeira vez en España un taller sobre as
posibilidades creativas da proxección cinematográfica en vivo, un
laboratorio de creación onde ampliar o eido de exploración
sensorial e reflexiva a través da multiplicidade e a simultaneidade
de operacións audiovisuais en vivo centradas na tecnoloxía
óptico-mecánica do cinema e a súa interacción. Como remate a esta
sección de didáctica dentro da Mostra, Claudio Caldini ofrecerá no
propio MAC unha conferencia que leva por título A imaxe máis aló
dos seus límites espaciais ás 20:00 horas do martes 11 de xuño.