A Mesa premia o labor de San Luís a prol do galego
xoves, 21 de novembro do 2013
Será
este venres (sexta feira) 22 de novembro ás 20:30 horas cando teña
lugar no Pazo
da Cultura de Carballo a celebración da 2ª edición do Premio
Abertos ao Galego, concedido pola Mesa
á cadea San Luís. O galardón, que o pasado ano recaeu na rede
social Tuenti, irá desta volta parar a mans da cadea de
electrodomésticos San Luís, e será recollido polo seu fundador, Lorenzo López, quen retoma a empresa logo de que Darty,
a multinacional que a mercara, decidise pechar as tendas. Xa no seu
día San Luís fora un referente e unha empresa pioneira na
publicidade en galego, como exemplo de continuidade está o lema do
seu regreso: Estamos
de volta.
- O empresario galego Lorenzo López Vázquez nunha imaxe da axencia EFE
Emporiso,
Abertos ao Galego
(proxecto da Mesa para a dinamización do galego no ámbito
empresarial) quere premiar o labor que dende os anos 70 leva feito
San Luís a prol da nosa lingua como elemento fundamental da
identidade o que -segundo verbas do propio xerente e fundador-
entende como parte imprescindíbel da marca da empresa. Nunha recente
entrevista na Radio Galega, na reapertura das tendas de San Luís,
afirmou: “Claro
que as nosas tendas están rotuladas en galego. Estamos en Galiza,
non? Todos temos patria, é a nosa aposta”.
Cómpre dicir
que o xurado da Mesa valorou a importancia simbólica da aposta
lingüística de San Luís, tanto polo sector ao que pertence coma
polo intre en que o antigo xerente retoma as tendas e o xeito en que
decide reabrilas. Na súa anterior etapa, San Luís era unha das
empresas líder do sector, o que serve para constatar algo que
indican todos os estudos do mercado: o uso do galego é un aliado
para o mundo socioeconómico.
Abertos
ao Galego é un proxecto da Mesa pola Normalización Lingüística
que ten como obxectivo a dinamización do galego no mundo da empresa.
Ademais da creación do Premio do que damos conta nesta nova, a Mesa
conta con outras iniciativas ao abeiro deste proxecto, é o caso do
catálogo de Nadal (que este ano se está a preparar por terceira
vez) ou presentacións comarcais, así como a creación dun boletín
informativo sobre as empresas integrantes de Abertos ao Galego, que
se envía de maneira periódica aos socios e socias e simpatizantes
da Mesa pola Normalización Lingüística.
Por
último,
sinalar que o acto de entrega, de entrada libre, será presentado
pola actriz Isabel
Risco
e contará coa actuación da cantante Najla
Shami.
- Invitación á entrega do Premio da Mesa