A IA e as TIC protagonistas do II Cumio Galego Contra os Discursos de Odio
venres, 16 de xuño do 2023
Preto
dun cento de persoas asistiron hoxe en Santiago de Compostela ao remate da
segunda edición do Cumio contra os discursos de Odio, impulsado pola
Coordinadora Galega de ONGD. O encontro, financiado polo Concello de Santiago
no marco do programa Compostela+Solidario, contou ademais coa colaboración do
Servizo de Participación e Inclusión Universitaria (SEPIU) da USC, e das
organizacións EAPN-Galicia, Agareso e Ecos do Sur.
Tras
a benvida, a primeira ponencia correu de mans da xornalista Paula Guerra
Cáceres, especializada en comunicación social e discriminación racial quen
falou sobre a Intelixencia Artificial. Guerra ofreceu unha pequena introdución
sobre o funcionamento dos algorítmicos das IA, os nesgos existentes nos
conxuntos de datos utilizados para adestrala e como estes poden reflectirse e
mesmo amplificarse nos resultados. Isto fai necesario traballar na
desracialización das IA para garantir que sexan imparciais e equitativas.
“A
día de hoxe non hai ningunha lei en España que obrigue ás entidades públicas ou
empresas a dar información sobre se utilizan algoritmos (AI) e como foron
entrenados”, explicou Guerra. “As IA non son neutrais, representan a ideoloxía
e o punto de vista das empresas que as crean, desenvolven e implementan.
Vivimos nun marco de racismo estrutural e polo tanto as IA reproducen estas
opresións racistas, machistas e discriminatorias”, explicou. “A tecnoloxía per
se non é mala, hai IA moi positiva, pero cando se trata de regular
cuestións que teñen que ver con dereitos detrás o que ten que haber son equipos
multidisciplinares tomando decisións e non un algoritmo”.
Pola
súa banda, Vivian Rangel de Maldita.es ofreceu unha charla centrada en como
identificar e combater os discursos de odio contra as persoas migrantes. A
xornalista explicou que moitas das consultas atendidas por Maldita teñen que
ver, precisamente, con este colectivo polo que se creou unha sección
específica, Maldita Migración para darlles resposta.
Vivian
relatou diferentes casos reais de bulos que remataron con graves consecuencias.
“Canto máis se comparte a desinformación créase unha atmosfera de desconfianza,
non hai desinformación que non faga mal, poden afectar ás persoas, aos
discursos de odio, contaminan o discurso público e hai bulos que matan”,
apuntou a xornalista. A xornalista de maldita advertiu que os bulos non os
lanzan necesariamente “persoas malas” senón que “moi a miúdo a xente difunde bulos sen saber que o están facendo,
simplemente porque cren que son verdade ou porque esa información se alinea
coas súas crenzas”.
O
programa completouse con tres quendas de intercambio de experiencias e boas
prácticas entre organizacións e colectivos que traballan contra os discursos de
odio. Así pola mañá participaron Down-Galicia, Fundación Juan Soñador, Érguete,
Igaxes, Fundación Secretariado Xitano, Agareso, Fagamos, EAPN, Ecos do
Sur, Fundación Esplai e o activista
Ibrahim Bah.
O
intercambio de experiencias da tarde puxo o foco nos países do Sur Global e
contou coa participación da defensora medio ambiental hondureña Yeni Karina Aguilar,
a activista dos dereitos sexuais e reproductivos do Salvador Bea Salazar e a
defensora dos dereitos humanos e transfeminista salvadoreña Grecia Villalobos.
En
paralelo, a ONGD Ecos do Sur aproveitou
o espazo do Cumio para compartir a experiencia de realidade virtual inmersiva The Machine To Be Another. Un proxecto concebido para poñerse, literalmente, na pel dunha
persoa migrante, e que a ONGD galega vén de activar coa organización Be Another
Lab.
- Participantes do Cumio