A Guarda presenta a súa plataforma de eAdministración
venres, 7 de abril do 2017
Seguimos
a dar conta de concellos galegos que se afianzan plenamente na
Administración Electrónica, con todo o que isto implica (cousas
como sede dixital de seu, tramitacións en liña, transparencia
gobernamental, participación cidadá, etc). Desta
volta informamos da dixitalización afrontada polo Concello da
Guarda, que vén de presentar, precisamente, a súa nova
ferramenta de Administración Electrónica, unha iniciativa que
contou co respaldo da Deputación de Pontevedra (achegando unha
plataforma específica que xa foi implantada plenamente, polo de
agora, na
Guarda e en preto dunha vintena de concellos máis). Segundo
informou o Goberno local, a partir de agora as veciñas e veciños
poderán “interactuar co seu Concello e realizar trámites
administrativos sen saíren da súa casa”.
O
obxectivo da integración desta ferramenta foi “modernizar a
xestión administrativa e fornecer aos cidadáns a posibilidade de
realizar xestións a través de Internet”.
O
Concello tamén informou de que con esta nova sede dixital, ademais,
cumpre a Lei 11/2007 de Acceso Electrónico dos Cidadáns aos
Servizos Públicos, que entrou en vigor o 1 de xaneiro de 2010 e que
se consolidou na Lei 39/2015 e 40/2015 que outorga o dereito aos
cidadáns de contaren cunha Administración Electrónica, resolutiva
e capaz de relacionarse con eles sen esperas e desde calquera lugar.
A
nova plataforma foi implantada na Guarda pola empresa española
esPublico, especializada en servizos xurídicos e na modernización
administrativa para a Administración Local, e que conta xa con máis
de 4.600 concellos en toda España e clientes en todas as provincias
do Estado. Segundo informa o Goberno guardés, a ferramenta Xestiona
de esPublico (que é a que se emprega no plan de eAdministración
para os concellos da Deputación de Pontevedra), salienta pola “súa
sinxeleza e pola súa facilidade de uso, tanto para o funcionario
como para o público, o que se combina coa máis innovadora
tecnoloxía e o estrito cumprimento da lei”.
Entre
outras cousas, permite a posibilidade de realizar rexistros
electrónicos e expedientes dixitais dentro do Concello e habilita
unha oficina virtual para o cidadán na que, ademais de iniciar os
seu trámites, pode consultar en todo momento o estado da súa
solicitude.
A
nova sede electrónica da Guarda está dispoñíbel en
aguarda.sedelectronica.gal.