A Galiciencia aborda a súa edición máis especial (a décima) con récord de concellos e proxectos
martes, 17 de novembro do 2015
Finalmente
comeza este mércores a feira científica para a xuventude
Galiciencia, sen dúbida un
dos maiores e máis prestixiosos eventos de divulgación de toda a
contorna estatal (por número de participantes, pola calidade dos
achados e inventos presentados, pola visualización que se acada cada
ano dos mesmos, etc). Segundo nos recorda a organización (a
Tecnópole de Ourense), a edición 2015 do evento é sen dúbida
“unha edición especial”. En parque porque se celebran con ela os
dez anos de historia da feira tecnolóxico-científica, e en parte
porque nunca antes se acadara un número tan alto de concellos
galegos concorrendo, un total de 17 (a participación máis diversa
das rexistradas nesta década de andaina do certame).
En
cuestión de proxectos tamén hai cifra récord.
De feito, presentaranse 74, dos que os 52 de Secundaria competirán
polo premio final, mentres que os 22 de Primaria se expoñerán fóra
de concurso. A eles súmanse catro proxectos de Catalunya e dous de
Euskadi.
Galiciencia
celébrase entre o mércores e o venres desta semana en Ourense. Máis
polo miúdo, na carpa que a Tecnópole habilitará na propia cidade,
un recinto que servirá para expoñer proxectos e recibir a
visita de grupos escolares de toda Galicia, ás que se sumarán as
persoas que acudan pola súa conta, con entrada libre para
particulares e familias tanto en horario de mañá, de 10 a 13 horas,
como de tarde, entre as 15 e as 18 horas.
A
representación máis numerosa na exposición de proxectos procede
dos concellos de Ourense e Vigo, con 12 inventos e enxeños cada un.
A provincia de Ourense complétase con outros 10 de Pereiro de Aguiar
e un de Pobra de Trives. De Pontevedra chegan, ademais dos de Vigo, 3
de Mos, 2 de Poio, 2 de Meis, un de Sanxenxo, un das Neves e outro de
Redondela. Da provincia da Coruña proceden 4 de Santiago, outros
tantos de Cambre e 4 máis de Ponteceso, que se completan con 2 de
Ferrol. No caso de Lugo, aos 4 do concello capitalino súmanse outros
4 de Folgoso do Courel e un de Ribadeo.
Segundo
informa a organización, a Galiciencia
chega á súa décima edición cunha oferta de actividades paralelas
á exposición de proxectos máis ampla que nunca, que inclúe a
conmemoración do Ano Internacional da Luz e das Tecnoloxías
baseadas na Luz a través de catro obradoiros
orientados a diferentes idades. Neles, os participantes descubrirán
os fundamentos e as propiedades da luz, das cores e do láser a
través de espectaculares experimentos. Esta será tamén a temática
da exposición instalada polo Consello Superior de Investigacións
Científicas (CSIC) e da charla que poderá seguirse online
desde calquera centro educativo de Galicia grazas á súa
retransmisión en streaming.
Polo
que atinxe aos máis
pequenos, a Tecnópole
lembra que “terán a
ocasión de mergullarse no mundo da robótica a través doutro
obradoiro”. Ademais,
todos os que visiten a Galiciencia poderán percorrer os dez anos do
evento a través dunha exposición de fotografía na que se recollen
os mellores momentos.