A Fundación CEL Iniciativas por Lugo estrea web
luns, 11 de maio do 2015
A Fundación CEL
Iniciativas por Lugo vén de anunciar a renovación completa (ao cen
por cen) da súa páxina web corporativa, fundacioncel.org,
tanto no seu plano visual e de feitura externa como no que se refire
a adaptala ás características dos elementos que se impoñen en
materia de acceso e uso: os dispositivos móbiles. En palabras dos
responsábeis da Fundación, “a páxina adquiriu un novo deseño e
unha presentación modernizada e máis social, que responde tanto á
necesidade de actualización de imaxe como aos novos requirimentos
técnicos que impón o mundo en liña”.
Entre estes novos
requirimentos, engade, atópase un deseño que responde a criterios
de RWD (en inglés Responsive Web Design), adaptábel aos
diferentes dispositivos electrónicos a través dos que pode
accederse á Rede (unha vía cada vez máis estendida, a dos
dispositivos), ou a integración do aspecto social, “facilitando o
acceso ás diferentes redes sociais nas que a Fundación ten
presenza, compartir os contidos da web ou facilitar os comentarios e
interacción cos seus usuarios”.
Desde a Fundación CEL
indícase que se busca “dar soporte de maneira máis clara e
intuitiva aos contidos da entidade e aos dos emprendedores que
acompañan a entidade e dan sentido á actividade da mesma,
emprendedores que sempre terán un espazo destacado na web”. Coa
remodelación da páxina tamén se vai salientar (e acubillar) o
labor das empresas que colaboran coa entidade e o seu traballo de
apoio ao emprendedor local.
A presentación da nova
web da Fundación CEL vén acompañada dunha actualización da súa
imaxe en redes sociais, un novo boletín en liña e
a posta en marcha dunha nova iniciativa, e+e, o blog dos
emprendedores e empresarios de Lugo, posto en marcha conxuntamente
coa Confederación de Empresarios de Lugo (CEL).