A FIC acolle este xoves un debate sobre a polémica Lei de Servizos Profesionais

A Lei de Servizos e Colexios Profesionais segue a ser motivo de preocupación e de debate para os nosos informáticos. Como lembraremos, este regulamento deixaría fóra da listaxe das enxeñarías (cos seus recoñecementos e deberes) á Enxeñaría en Informática e á Enxeñaría Técnica en Informática, o que redundaría nunha situación de non recoñecemento, dende os ámbitos públicos e académicos, das atribucións profesionais dos informáticos. En definitiva, estamos ante unha Lei (coñecida como LSCP) que suporía (tal e como está) un gran agravio para os dereitos dos profesionais que constrúen, cada día, en Galicia e no resto do Estado, a Sociedade da Información. Debater fondamente sobre a LSCP é o gran obxectivo da mesa redonda A Futura Lei de Servizos e Colexios Profesionais organizada pola Facultade de Informática o día 3 de abril.
Na mesa redonda participará Fernando Suárez, presidente do Colexio Profesional de Enxeñaría en Informática de Galicia (CPEIG), Ramón Bermúdez de Castro Olavide, decano do Colexio Oficial de Telecomunicacións de Galicia (COETG), e Carlos Nárdiz Ortiz, decano do Colexio de Enxeñeiros de Camiños, Canais e Portos de Galicia. Actuará como moderador Luis Castedo Ribas, catedrático da Facultade de Informática da UDC.
Segundo nos lembra o CPEIG, a futura Lei de Servizos e Colexios Profesionais atópase na recta final da súa aprobación e “á espera do informe preceptivo do Consello de Estado para que o Goberno dea o seu visto e prace a un texto do que están moi pendentes os colexios e servizos profesionais”. E engade o Colexio: “A nova norma ten como obxecto establecer os principios, bases e directrices precisos para garantir o libre acceso ás actividades profesionais e o seu libre exercicio, así como actualizar e completar a regulación das peculiaridades propias do réxime xurídico do colexios profesionais”.
As implicación desta lei no ámbito da Enxeñaría serán obxecto de análise o día 3 de abril a partir das 12.30 horas no salón de actos da Facultade de Informática da Universidade da Coruña.