A FAD intensifica nas redes sociais a loita contra o consumo de alcol e drogas na mocidade

A Fundación de Axuda contra a Drogadicción (FAD) iniciou ao longo dos pasados meses novas actividades e estratexias nas redes sociais para ampliar o seu radio de acción promovendo a prevención e a loita contra as drogas en calquera das súas manifestacións, facendo especial fincapé no problema do alcol entre as novas xeracións. Á súa presenza nas redes sociais Facebook, Tuenti, YouTube e Twitter (comunidades nas que conta, en total, con 8.400 seareiras e seareiros) cómpre engadir a posta en marcha de dous cadernos de seu, o Blog das Boas Novas e Por que non facemos algo diferente esta finde?, iniciativas destinadas a amosar perante o mundo as múltiples accións solidarias e emprendedoras que leva a cabo a nosa xuventude co fin de abrir camiños alternativas ao consumo de drogas e outras adiccións e hábitos non saudábeis.
Volvendo á presenza activa nas redes sociais, a FAD conta exactamente cun posicionamento de 8.421 seareiros nas devanditas catro rede sociais, cifra que representa o dobre do que se atesouraba na mesma data en 2011. A través dos diferentes contidos vertidos ao seu abeiro, a Fundación quere acadar “un espazo de comunicación que promova a reflexión sobre a prevención do consumo de drogas a través da participación e o diálogo”.
Respecto ás bitácoras o Blog das Boas Novas (a Fan Page de Facebook) e Por que non facemos algo diferente esta finde?, dicir que contan co apoio da rede propia de Voluntariado Virtual, que impulsa a difusión de contidos e amplía a base social das ditas iniciativas, nutríndoas de accións propias, actualidade informativa e ligazóns a novas de interese espalladas polas redes, “todo isto estruturado en diferentes seccións semanais e quincenais que achegan dinamismo a cada un dos seus perfís”. Ao devandito cómpre engadir a posta en marcha da nova campaña de sensibilización social 144horas.com, web específica da campaña número 41 da FAD que se presenta baixo o lema O tempo que lle dedicas ao alcol quítasllo a todo o demais e que consiste basicamente en amosar o número total de horas que investimos durante o verán no consumo deste tipo de bebidas no canto de levar a cabo calquera outro tipo de actividade máis saudábel.