A ESEI de Ourense recunca na súa colaboración con Galicia Open Future
xoves, 14 de abril do 2016
Logo do
acto celebrado o martes no Centro Demostrador TIC de Santiago,
Telefónica volveu presentar esta semana os detalles da nova edición
de Galicia
Open Future (a terceira), desta volta perante
os alumnos, investigadores e profesores da Universidade da Vigo
(Campus de Ourense). A cita volveu contar coa presenza de Mari
Carmen López, directora do centro de crowdworking que a dita
operadora impulsa na Cidade da Cultura (Santiago) coa colaboración
de AMTEGA. Segundo lembrou na Escola Superior de Enxeñaría
Informática (onde se desenvolveu esta nova presentación) a terceira
edición de GOF ten aínda aberto o prazo de presentación, máis
polo miúdo até este 15 de abril.
Escolleranse, das achegas
que soliciten a súa inclusión no centro de emprendemento, un total
de 50 proxectos empresariais innovadores, de alicerce tecnolóxico.
Poderán, ao longo dos meses seguintes, madurar as súas ideas de
negocio a través da formación, o asesoramento e, tamén, mediante o
traballo en mancomún (apoio directo, intercambio de información e
recursos) cos restantes emprendedores que participen en Galicia Open
Future e máis nas múltiples palestras de emprendemento que
Telefónica impulsa no mundo (de aí o de “centro de crowdworking”,
que alude a unha evolución cuantitativa e tamén cualitativa do que
se coñece como traballo colaborativo, co-working).
Entre os múltiples
apoios que recibe GOF na nosa terra está precisamente (un ano máis)
o da Escola Superior de Enxeñaría Informática do Campus de
Ourense, que aposta por esta iniciativa contribuíndo á súa
difusión entre o seu alumnado, que en anteriores edicións
participou con varios proxectos empresariais nel.
“Galicia Open
Future”, explicou a súa directora durante a sesión do martes, “é
o centro de emprendemento galego impulsado por Telefónica en
colaboración coa Xunta de Galicia, a través da Axencia para a
Modernización Tecnolóxica de Galicia (AMTEGA) e a Consellaría de
Economía, Emprego e Industria; un programa no que Telefónica
inviste anualmente preto dun millón de euros, ten unha duración
inicial de seis meses, prorrogábeis en períodos de tres meses”.
Os emprendedores elixidos, explicou, reciben formación e
adestramento especializado adaptados ás diferentes fases de
maduración do seu proxecto (idea, semente, prototipo, piloto ou
lanzamento) e do seu modelo de negocio. A través do Programa de
Incentivos da Xunta, a Axencia Galega de Innovación outorga unha
axuda de 2.000 euros a cada un dos proxectos seleccionados, e
“mediante a plataforma web poden entrar en contacto con
emprendedores de todo o mundo involucrados no programa de innovación
Open Future de Telefónica, cuxo obxectivo é conectar a
emprendedores, startups, investidores e organizacións
públicas e privadas”, engadiu, explicando tamén que os
beneficiarios poden acceder ás vantaxes de traballar na sede de
Galicia Open Future, situada na Cidade da Cultura.
Tamén recordou
que superada a primeira fase de formación, un xurado de expertos
seleccionará ao tres mellores en función da súa achega aos
sectores estratéxicos de Galicia, a súa innovación, o potencial de
mercado, o grao de maduración e a súa viabilidade, ademais da súa
composición multidisciplinaria, a súa motivación e o uso de
tecnoloxía diferencial. Recibirán unha achega de ata 25.000 euros
da Axencia Galega de Innovación, que deberá destinarse ao
desenvolvemento do propio proxecto. Poderán acceder tamén a un
préstamo reembolsábel concedido por XesGalicia por un valor máximo
doutros 25.000 euros. Un total de 330 iniciativas emprendedoras de
base tecnolóxica xa participaron nas dúas primeiras edicións de
Galicia Open Future.