A ESEI de Ourense celebra este venres a Hora do Código
mércores, 9 de decembro do 2015
A Escola
Superior de Enxeñaría Informática da Universidade de Vigo (Campus
de Ourense) vai celebrar este venres 11 unha xornada de portas
abertas para amosar como se constrúen programas e sistemas
informáticos. É dicir, para introducirnos no día a día da
construción do gran edificio da Sociedade do Coñecemento. A
iniciativa vai dirixida a rapazas e rapaces de 6 a 17 anos e, máis
polo miúdo, consistirá en acharlles nocións básicas de
programación, impresión en 3D e robótica. A actividade insírese
nas celebracións mundiais da Hora
do Código, iniciativa internacional ao que o centro se une xunto
ao Colexio Profesional de Enxeñaría en Informática de Galicia
(CPEIG) e á Concellaría de Educación de Ourense.
A xornada de portas
abertas foi presentada este luns no Campus de Ourense polos
representantes das entidades organizadoras. No acto estivo presente
Ana Garriga, directora da Escola, quen salientou a importancia de que
nenos e mozos coñezan “o que hai detrás de instrumentos que
empregan todos os días, que forman parte xa da súa vida diaria”.
O obxectivo da iniciativa é, recalcou Fernando Suárez, presidente
do CPEIG, “estender os coñecementos de ciencias da computación”
aos máis pequenos e pequenas para que “coñezan os conceptos e o
mundo no que viven”, un mundo no que a tecnoloxía está cada día
máis presente a todos os niveis. “Unha hora de código pode
resultar moi enriquecedora”, subliñou Belén Iglesias, concelleira
de Educación, que fixo fincapé en que a programación é hoxe en
día “unha das linguaxes máis universais que existen” e que o
seu coñecemento fomenta habilidades como a creatividade e a lóxica.
Lembrar que o proxecto
Hour of Code, Hora do Código, está promovido desde o ano
2013 pola entidade sen ánimo de lucro estadounidense Code.org.
Trátase dun evento internacional que consiste nunha introdución
dunha hora de duración ás ciencias da computación, deseñada para
amosar que todo o mundo pode aprender a programar.
Segundo fixeron saber
na dita presentación, a ESEI de Ourense acollerá tres actividades
principais a desenvolver coa participación de voluntarios do centro
e do colexio profesional. A primeira actividade será de introdución
á programación e nela haberá sesións dunha hora na que as rapazas
e rapaces de 6 a 10 anos poderán aprender a programar xogos de
Starwars ou Frozen. Tamén haberá sesións de
iniciación ao Scratch, nas que poderán inscribirse nenas e nenos de
10 a 16 anos. A segunda actividade, deseñada para cativos de 10 a 15
anos, será de impresión en 3D. Nela, “as persoas participantes
poderán aprender como se fan pezas e se traballa con escáners,
impresoras e lapis 3D”, sinalouse. Por último, celebrarase unha
actividade de programación de dispositivos de robótica con Arduino,
pensada para adolescentes de 13 a 17 anos. Para cada actividade
haberá varias aulas habilitadas, celebrándose sesións a diferentes
horas ás que tamén poden asistir os pais e nais que o desexen.