A ESEI de Ourense amosa a súa preocupación ante o borrador de Lei de Servizos Profesionais
luns, 22 de abril do 2013
Seguen
a medrar en número as voces galegas en contra do suposto borrador do
proxecto de Lei de Servizos Profesionais que segundo se anunciou os
días pasados nos medios estaría a impulsar o Goberno. Se xa dimos
conta das posturas do Colexio
Profesional de Enxeñaría Técnica en Informática de Galicia
(CPETIG) e máis do Colexio Profesional de Enxeñaría en Informática
de Galicia (CPEIG), agora é a quenda do Campus de Ourense, máis
polo miúdo dos responsábeis da Escola Superior de Enxeñaría
Informática (ESEI), que
están a amosar a súa preocupación ante a posibilidade dun
regulamento neste senso. Lembrar que o no dito borrador, entre
outras cousas negativas para os profesionais TIC, inclúese unha nova
clasificación para os estes colectivos, ao deixarse ás enxeñarías
en informática explicitamente fóra do conxunto de títulos que
darían acceso a unha profesión de enxeñeiro.
Así
ficará fixado na disposición adicional segunda de dito borrador,
que establece as “atribucións profesionais na enxeñaría”
e que se coñeceu a través de diversos medios de comunicación estes
días. Segundo explicou Ana Garriga, directora da ESEI, “de
confirmarse esta redacción, suporía que as profesións de Enxeñaría
Técnica en Informática e Enxeñaría en Informática poderían
quedar fóra do recoñecemento profesional que merecen tras máis de
25 años de desenvolvemento en España”.
Pola relevancia
destas implicacións, a dirección da centro quixo sumarse á
preocupación e ao rexeitamento deste borrador que teñen manifestado
organismos como a Conferencia de Directores e Decanos de Enxeñaría
Informática (CODDII), o Consello de Enxeñeiros en Informática
(CCII), o Consello de Colexios Oficiais de Enxeñaría Técnica en
Informática e a Reunión de Estudantes de Enxeñarías Técnicas e
Superiores en Informática (RITSI). Precisamente no seu comunicado
conxunto sobre este tema, a RITSI e CODDII, advertindo que esta
exclusión minguaría as responsabilidades profesionais dos
enxeñeiros informáticos, sinalaban que Enxeñaría Informática xa
ten recoñecida academicamente a súa equiparación co resto de
enxeñarías tras publicarse no BOE de 4 de agosto de 2009 as
recomendacións para a elaboración de plans de estudos en este
ámbito.