A Deputación de Pontevedra quere mellorar a comunicación dixital en ámbalas beiras do Miño
martes, 21 de agosto do 2018
Afondar
na realidade dos medios de ámbalas beiras do Miño para achegar un
diagnóstico da comunicación compartida e mellorar aínda máis o
seu estado de saúde. Este
é un dos grandes obxectivos de A raia no medio, un estudo
sobre os medios fronteirizos galego-portugueses impulsado polo
Departamento de Cooperación Transfronteiriza da Deputación de
Pontevedra, dirixido por Uxío Benítez, en colaboración co
Instituto Galego de Análise e Documentación Internacional (IGADI).
A través deste traballo, elaborarase unha base de datos das
iniciativas de comunicación local, desde radios a xornais físicos e
dixitais, a iniciativas en redes sociais, blogs ou revistas e
magazines.
O
obxectivo é “identificar as fortalezas e debilidades da
comunicación” dixital e tradicional neste territorio por medio da
sistematización e análise de entrevistas a medios de comunicación,
responsábeis institucionais e “persoas chave” no ecosistema da
eurorrexión, como expertas na cooperación transfronteiriza, ou
entidades referenciais da sociedade civil galega e portuguesa.
Segundo
explicou o deputado de Cooperación Transfronteiriza e director da
AECT Río Miño, Uxío Benítez, esta iniciativa permitirá
“fortalecer o coñecemento mutuo entre os medios de comunicación
do territorio que comprende o río Miño”. A idea é facilita “a
creación de novos mecanismos que permitan unha maior e mellor
comunicación”.
Nunha
primeira fase de traballo, o IGADI centrouse na identificación das
ducias de medios de comunicación de ámbito local existente no
espazo da AECT Río Miño. Neste primeiro contacto, constatouse “unha
alta ilusión na procura de fórmulas que axuden a diluír a
fronteira e a promover un desenvolvemento integral no territorio
galego-portugués”.
O
proxecto rematará entre os meses de outubro e novembro coa
presentación do informe final e a realización dun obradoiro de
contraste aberto á participación das entidades que formaron parte
do estudo e da cidadanía en xeral.
O
proxecto pode seguirse por medio das redes sociais do IGADI a través
do cancelo #ARaiaNoMedio. As persoas ou entidades interesadas en
participar ou coñecer máis de preto este proxecto poden facelo a
través do enderezo electrónico info@igadi.org.