A Deputación de Pontevedra quere afianzar a comunicación coa cidadanía na súa nova páxina web
martes, 13 de decembro do 2016
Onte
presentábase perante os medios a nova páxina web da Deputación de
Pontevedra, e facíao a presidenta da Deputación, Carmela Silva
e o vicepresidente, César Mosquera. Dende a Deputación fíxose
fincapé en que a viraxe desta páxina foi feita polos propios
servizos de comunicación e de novas tecnoloxías da institución
provincial. Así, o novo espazo web estrearase este xoves 15 de
decembro e pasará a substituír ao actual, que, segundo fixeron
saber Silva e Mosquera, “pola súa dificultosa navegación facía
minguar as visitas por parte dos cidadáns”.
En
canto á nova web, Silva salientou que é moi visual e máis
transparente pois vai contar con toda a información institucional
para que todos os que o desexen poidan coñecer o traballo da
Deputación de Pontevedra. "Vai ser unha páxina moito máis
participativa, continuou Silva, para que poidamos achegar a
representación política aos cidadáns con enquisas semanais
mellorado así a nosa comunicación cos pontevedreses e
pontevedresas".
César
Mosquera apuntou que se foron poñendo en orde os contidos para
aumentar a súa visibilidade e comodidade para os usuarios: "En
moitas ocasións hai unha disputa política para que aparezan moitas
cousas. Neste caso houbo un esforzo en reducir os campos para
facilitar a lexibilidade e o uso. Agardo que sexa un éxito".
A
presidenta tamén subliñou a maior presenza dos concellos da
provincia, "que terán un apartado para as súas novas ou aquilo
que queiran amosar na nosa páxina".
Outra
das novidades tecnolóxicas que presenta a nova web é a súa
adaptación aos distintos formatos de navegación, non só dende os
computadores senón tamén dende tabletas ou teléfonos móbiles.
Carmela
Silva lembrou a clara aposta que está a facer a Deputación de
Pontevedra polas novas tecnoloxías: "Estamos activamente en
Twitter, Facebook, Youtube, Instagram, Periscope e Linkedin. En
Twitter, xa somos a Deputación galega con maior número de
seguidores, 7.276, e acadamos case 400.000 impresións mensuais nesta
rede social”.