A Deputación de Ourense pon a debate as novas formas de comunicación na política
xoves, 31 de maio do 2018
A profesión política xa non pode ficar á marxe
das novas ferramentas de comunicación. Non se trata só de que a
cidadanía as use cada vez máis no seu día a día, senón que con
elas ábrense camiños de participación, colaboración e
transparencia que antes, coa comunicación tradicional entre
representantes públicos e cidadanía, nin se daban nin se esixían.
Poden as ferramentas dixitais garantir un mellor exercicio do labor
político? Sen dúbida si. Esta
é é unha das bases da sétima Xornada sobre as deputacións do
futuro, co-organizadas pola Deputación de Ourense. A cita é
este 1 de xuño, no Centro Cultural Marcos Valcárcel.
O obxectivo xeral, en palabras da entidade
provincial, é “analizar iniciativas de innovación aplicadas á
xestión dos gobernos locais e provinciais”. O evento será
inaugurado polo presidente da Deputación, Manuel Baltar, e o xerente
da fundación Democracia e Goberno Local, José Luis Moreno Torres,
entidade co-organizadora da xornada, coa que se queren achegar
recursos e coñecementos de valor para cargos electos, representantes
institucionais, técnicos das administracións locais e provinciais e
persoas interesadas nesta temática.
A xornada, no que se refire ao plano máis
innovador e tecnolóxico, incluirá relatorios sobre A importancia
de construír unha mensaxe eficaz (a cargo da catedrática de
Lingua Española da Universidade de Barcelona, Estrella Motolio) ou
sobre As novas formas de comunicación a través das redes sociais
(a cargo de Fran Carrillo, director xeral da consultora de
comunicación La Fábrica de Discursos).
A finalidade do evento, segundo afirma Manuel
Baltar “é seguir mellorando, revisando e poñendo en marcha
solucións sobre arquitectura, competencias, xestión, financiamento
e comunicación das administracións públicas, unha iniciativa que
puxemos en marchas desde Ourense para que sexa un punto de encontro
da actualidade da administración local e provincial, co obxectivo de
analizar modelos que permitan aumentar a eficacia na xestión dos
entes administrativos”.