A Deputación de Ourense amosa en Madrid o seu modelo de vídeo-acta
xoves, 3 de marzo do 2016
Esta semana estase a celebrar en Madrid (sede da
Fábrica de Moeda e Timebre) a sexta edición do Congreso de
Innovación e Servizos Públicos (CNIS), unha actividade destinada a
debater sobre as metodoloxías máis axeitadas para xestionar a
transformación dixital das administracións, entre outros
obxectivos. O evento, que se vén desenvolvendo dende 2011, está a
contar con presenza galega. Máis
polo miúdo a da Deputación de Ourense, cuxo vicesecretario xeral
presentou este 2 de febreiro un relatorio sobre vídeo-actas
municipais, tecnoloxía, legalidade e transparencia. Na súa
intervención Marquina fixo referencia ao desafío e potencial das
novas tecnoloxías para a comunicación nas administracións,
aplicadas sobre todo no eido das sesións plenarias, comisións
informativas e mesas de contratación, “coa finalidade de dispoñer
á tecnoloxía a prol dunha maior proximidade e achegamento á
cidadanía”.
O vicesecretario xeral, nun plano máis concreto,
amosou o seu modelo de vídeo-acta, sistema de xestión documental
que permite a elaboración das actas dos plenos no menor tempo
posíbel. “A solución”, sinalou, “baséase na integración
vídeo e documentos electrónicos firmados dixitalmente mediante DNI
electrónico". Segundo engadiu Marquina, o sistema "combina
a gravación en vídeo dos plenos co documento electrónico que
contén a orde do día da sesión, todo asinado de maneira
electrónica co certificado dixital ou o eDNI do presidente e do
secretario da entidade local, para dar fe legal do acto”. Asemade,
no congreso falouse da xestión da transparencia que se leva a cabo
coa canle-vídeo dispoñíbel na web da Deputación de Ourense, que
permite a retransmisión en directo e por streaming das
sesións e reunións doutros órganos colexiados, como Comisión
Informativas e Mesas de Contratación.
O CNIS que se ven desenvolvendo dende o ano 2011 é
en palabras da Deputación “un punto de encontro de ámbito estatal
sobre Administración Electrónica, no que se reúnen os
representantes das distintas Administracións Públicas, as
principais empresas do sector e diversos expertos relacionados coa
materia”. Nesta sexta edición debátese sinaladamente sobre todo o
que está a afectar hoxe en día ás institucións obrigándoas a
xestionar a súa transformación a partir das novas capacidades
tecnolóxicas, ao servizo das persoas: cidadáns, empresas e as
propias administracións.