A Deputación de Lugo sinala as novas tecnoloxías como ferramentas primordiais para saírmos da crise
xoves, 17 de setembro do 2020
A
Deputación de Lugo vai
fortalecer a súa capacidade para captar e xestionar fondos europeos.
O obxectivo é que estes recursos cheguen aos concellos máis
pequenos e reforcen, entre outras cousas, a súa transformación
tecnolóxica e melloren os servizos que ofrecen á cidadanía. Así o
fixo saber este xoves o presidente da entidade provincial, José
Tomé, quen participou na conferencia de alcaldes e presidentes
provinciais que organizou o Eixo Atlántico no Teatro Principal de
Pontevedra co gallo de afondar nas metodoloxías máis acaídas para
recuperarnos económica e socialmente.
José
Tomé compartiu co resto de autoridades e expertos as liñas
estratéxicas de actuación que propón para financiar cos fondos
europeos de reconstrución, baseadas nunha recuperación transversal
que aposte polo equilibrio do territorio. Entre estas medidas
inclúese o desenvolvemento dun plan de reactivación de emprego e da
actividade económica (moi orientado ás pemes e aos autónomos e á
industria), un programa de cobertura dixital a través de
infraestruturas tecnolóxicas avanzadas (que porá o foco no medio
rural en combater as zonas de sombra existentes na actualidade, co
“obxectivo de garantir a igualdade de oportunidades, reducir a
fenda dixital e facilitar a todas as persoas o dereito universal de
acceso a Internet”, subliñou Tomé Roca) e un plan para promover o
territorio a través do turismo innovador (apostando polo turismo de
calidade, sustentábel no tempo e vinculado á paisaxe, á
gastronomía e á cultura).