A Deputación de Lugo proxecta a Reserva da Biosfera Terras do Miño nun encontro dixital
venres, 2 de xullo do 2021
Este
venres 2 de
xullo inaugurouse o encontro dixital Somos Biosfera - Terras de Miño,
organizado polo CEIDA e a Deputación de Lugo para visualizar o
incalculábel valor medio ambiental deste territorio e pór sobre a
mesa diferentes propostas innovadoras e tecnolóxicas de colaboración
para incidir no seu desenvolvemento sustentábel. Participou a
deputada de Réxime Interior, Promoción do Territorio e Turismo,
Pilar García Porto, que recoñeceu o compromiso da entidade co medio
ambiente, que “busca poñer en equilibrio o respecto á natureza e
o desenvolvemento social e económico do territorio e das persoas”.
Esta
cita foi posta en marcha polas Reservas da Biosfera de Galicia e
organizado polo Centro de Extensión Universitaria e Divulgación
Ambiental de Galicia (CEIDA) coa colaboración da Deputación.
“Non
ten sentido contrapoñer progreso e conservación; o que debemos
facer é converter os programas de conservación da natureza en fonte
de progreso, de emprego no rural, de turismo sustentábel, de
conservación de costumes tradicionais e de fixación de poboación
no territorio”, destacou García Porto.
Durante
unha xornada, os corenta asistentes formáronse acerca da xestión
deste territorio coa técnico do servizo provincial de Medio Ambiente
Andrea Macho Benito, e puideron coñecer as oportunidades de
certificacións con Alberto Rojo Alboreca, técnico do Órgano Reitor
da Reserva da Biosfera, e o xestor de proxectos de FSC-España,
Marcos Estévez Malvar, xestor de Proxectos de FSC-España. Tamén
descubriron os recursos deste territorio co guía oficial de Turismo
Guido Álvarez Parga.
Estas
xornadas continuarán o vindeiro venres 9 de xullo cunha formación
online vinculada á Reserva da Biosfera Os Ancares Lucenses e
Montes de Cervantes, Navia e Becerreá, tamén xestionada pola
Deputación de Lugo.