A Deputación de Lugo forma en tecnoloxías de información xeográfica a técnicos da Mariña
martes, 12 de marzo do 2019
Estes
días, o Goberno da Deputación
de Lugo está a brindar formación de balde en tecnoloxías
avanzadas de localización e cartografía a técnicos municipais de
15 concellos da Mariña. E faino a través do Curso de Sistemas de
Información Xeográfica (SIX) orientado á xestión técnica
municipal. O obradoiro en cuestión desenvolvese ata o 29 de marzo
nas dependencias da aula CeMIT de Burela.
Está
impartido por técnicos do Laboratorio do Territorio (LaboraTE) da
Universidade de Santiago no Campus Lucense. A formación consiste no
emprego de Sistemas de Información Xeográfica co uso do programa de
software libre Quantum GIS(QGIS). O obxectivo é favorecer que os
técnicos municipais dos municipios da costa de Lugo se familiaricen
coas moitas posibilidades da devandita ferramenta, un recurso, en
palabras da Deputación, “moi demandado na actualidade e, porén,
moi pouco empregado no eido da administración local”.
Segundo
lembra a entidade provincial, os Sistemas de Información Xeográfica
e a Enquisa de Infraestrutura e Equipamentos Locais serven para
“elaborar planos con cartografía totalmente actualizada,
mellorando a calidade nos informes municipais”. Ademais, engade a
Deputación, “os ditos programas poderán empregarse como
instrumento básico de análise e valoración dos bens e servizos dos
concellos, así como para a planificación do territorio que se
xestiona”.