A Deputación de Lugo bota man da impresión 3D para os seus obradoiros medioambientais
luns, 4 de marzo do 2019
A
Deputación de
Lugo, a través das actividades medioambientais do río Rato,
organiza estes días un novo obradoiro de balde sobre ciencia,
entroido e medio ambiente. Trátase da segunda edición dunha
actividade na que participan 20 persoas, dende hoxe até o 6 de maio,
no Centro de Interpretación Terras do Miño. O taller inclúe
experimentos prácticos (como xerar luz con bicis, como facer
disfraces ecolóxicos, como almacenar enerxía) para introducir aos
participantes no método científico de forma lúdica e nunha máis
ampla conciencia medioambiental. A base técnica da actividade, que
en última instancia fomenta hábitos de vida que respecten a
natureza, é a impresión 3D.
O
vicepresidente e deputado de Medio Ambiente, Argelio Fernández
Queipo, subliñou que “con este tipo de actividades de campo
achegamos o mundo científico a todos os veciños lucenses dun xeito
lúdico e atractivo”. Ademais, engadiu, “será un traballo de
responsabilidade e de compromiso con medio ambiente, xa que os
participantes achegaranse a distintas disciplinas científicas como a
Química, Física, Bioloxía, Botánica, Biodiversidade, Xeoloxía ou
a Vulcanoloxía”.
Amais
de introducirse en temáticas concretas como a botánica do Courel ou
a biodiversidade nas Terras do Miño, os participantes elaborarán
disfraces para o entroido cunha impresora 3D, mediante o método das
3 erres da ecoloxía: reducir, reutilizar e reciclar). Con isto
preténdese mostrar como reducir o volume de refugallos ou de lixo
xerado.
De
forma paralela, os asistentes terán a oportunidade de xerar enerxía
eléctrica cunha bicicleta, para que persoas que non teñen acceso á
electricidade ou sofren cortes periódicos por temporais, poidan
gozar dela dunha maneira sustentábel. Neste experimento amosarase
como almacenar a electricidade e alimentar aparellos que decote
enchúfanse á rede, mediante o subministro de corrente a un xerador
co movemento da roda traseira da bicicleta, para acender unha lámpada
ou cargar o teléfono.
Os
asistentes ao obradoiro fabricarán tamén neve para simular un
temporal que provoque cortes na subministración eléctrica e
problemas na rede viaria da montaña lucense. Para o experimento,
disporán dun robot que programarán como máquina quita neves.
Algunhas das pezas necesarias para o proxecto fabricaranas na aula
coa axuda dunha impresora 3D.