A Deputación de Lugo achega aos concellos unha nova ferramenta anti-corrupción

A Deputación de Lugo organizou este luns 26 de xuño unha xornada informativa para as entidades locais da provincia sobre a Canle de Denuncias, un servizo informatizado sobre infraccións normativas e loita contra a corrupción que esixe a UE. O deputado en funcións de Promoción Económica e Social, Pablo Rivera Capón, deu a benvida a máis dunha decena de técnicos de diferentes concellos.
“Nesta xornada ofrecemos información aos concellos sobre como poden activar a Canle de Denuncias, como é o proceso para realizar comunicacións ou como xestionalo”, asegurou o Deputado, quen tamén deu conta aos representantes municipais do convenio tipo que vén de aprobar a Deputación para que os concellos se adhiran coa finalidade de poder participar nas accións que a institución vai desenvolver grazas aos 4M€ que captou de fondos europeos para avanzar na dixitalización da administración local. “Uns fondos”, dixo, “que servirán para mellorar a resiliencia dos municipios, crear oficinas de asistencia en materia de rexistro, implantar un sistema de gravación nos plenos dos concellos da provincia ou mellorar a accesibilidade das páxinas webs dos concellos”.
Á xornada asistiron representantes dos concellos de Antas de Ulla, Baleira, Baralla, O Incio, Láncara, Palas de Rei, O Páramo, Pedrafita do Cebreiro, A Pontenova, Ribas de Sil e Xermade. Un técnico explicoulles que, en cumprimento do establecido na Lei 2/2023, de 20 de febreiro, reguladora da protección das persoas que informen sobre infraccións normativas e de loita contra a corrupción, a Deputación Provincial de Lugo implantou xa este sistema interno de información e que servirá para que os cidadáns poidan informar sobre infraccións penais ou administrativas.
Na páxina web da Deputación xa se pode acceder a información relevante sobre a Canle de Denuncias, o responsábel do sistema, os dereitos do informante e a política de protección de datos. Así mesmo, pódese consultar o procedemento establecido para a xestión das comunicacións recibidas.