A Deputación da Coruña quere acadar o máximo nivel de eAdministración na provincia
xoves, 7 de abril do 2016
Dende a
Deputación da Coruña veñen de informar da súa intención de
acadar un nivel do 100% en materia de implantación de Administración
Electrónica, tanto no seu seo coma nos concellos da provincia.
Con este fin, a Deputación da Coruña licita por 1,2 millóns de
euros a ampliación de servizos e instalacións do Sistema Integrado
de Xestión Municipal AL-SIGM nos vindeiros dous anos, segundo
explicou o presidente provincial, Valentín González Formoso, quen
lembrou que a entidade que dirixe “vén traballando dende hai tempo
neste ámbito e xerando a experiencia precisa para acadar unha
Administración integramente electrónica, con cero papel e
interconectada.
Estes obxectivos,
engadiu, posibilitarán dotar os procesos administrativos “de máis
axilidade, accesibilidade e control”, beneficiando tanto ao cidadán
como aos propios concellos, “aos que apoiamos neste proceso de
cambio tecnolóxico", sinalou.
González Formoso,
amais, enumerou as vantaxes e funcionalidades da plataforma AL-SIGM,
a través da cal os concellos poden levar a cabo a xestión integral
do procedemento administrativo dun expediente. “Alén disto”,
dixo, “a través das 85 sedes electrónicas municipais impulsadas
pola Deputación na provincia, os cidadáns poden realizar dende o
seu enderezo xestións administrativas cotiáns como a solicitude dun
volante de empadroamento, dunha subvención ou dunha licenza, así
como recibir información do estado do proceso do expediente e
notificacións do resultado das súas xestións”. En total,
engadiu, están operativos un total de 85 portais de transparencia
locais.
Seguindo co reconto de
retos acadados, o presidente da Deputación lembrou que o ano pasado,
os concellos da provincia da Coruña aos que dá soporte a entidade
que dirixe tramitaron “máis de 70.000 expedientes de xeito
dixital, aos que hai que cómpre engadir os mais de 10.000
correspondentes á Deputación”. Esta, de feito, tramita xa
exclusivamente por vía telemática programas como os plans de
investimentos encamiñados aos concellos da provincia (POS, PAS,
PAI...) ou os programas de subvencións para actividades culturais,
deportivas, económicas, etc.