A Deputación da Coruña impulsa a creación de Oficinas de Rexistro Cl@ve en Cariño, Coirós, Dumbría, Muxía e Neda
venres, 19 de maio do 2023
A Deputación da Coruña impulsou a creación de
cinco novas Oficinas de Rexistro Cl@ve en concellos da provincia.
Deste xeito, Cariño,
Coirós, Dumbría, Muxía e Neda poden xa obter nos seus concellos a
identificación Cl@ve para acceder aos servizos e trámites a través
da Administración Electrónica.
Segundo informou a Deputación, as oficinas
(entidades físicas de rexistro dixital) quedaron activadas este 16
de maio. Con elas,” materialízase así un dos obxectivos
principais do proxecto Concello Dixital: achegar de forma real é
útil a administración electrónica á cidadanía”, engadiu a
entidade provincial.
Calquera persoa que así o desexe poderá obter de
modo presencial e sen desprazarse fóra do seu concello, a
identificación Cl@ve necesaria para acceder aos servizos públicos a
través da Administración Electrónica, entre se atopan as propias
sedes electrónicas municipais. A acreditación da identidade faise
coa presentación do DNI e un número de teléfono móbil, nacional
ou estranxeiro, a onde chegara a mensaxe (SMS) de benvida ao sistema.
Estas novas oficinas súmanse xa ás existentes
nos concellos de Abegondo, Boqueixón, Cambre, Curtis, Oroso, Santa
Comba e Vedra, entidades que xa finalizaron, con éxito, o seu
proceso de transformación dixital ao abeiro do proxecto impulsado
pola Deputación coruñesa.