A Deputación da Coruña festexa nas redes o Día de Rosalía
mércores, 24 de febreiro do 2021
A
Deputación
da Coruña, a través da súa área de Cultura, vai festexar o Día
de Rosalía (este mércores 24 de febreiro) cunha xornada especial do
seu festival online. Este desenvolverase até o vindeiro 3 de
marzo con novos contidos arredor da nosa escritora inmortal. A música
Uxía, a escritora María Reimóndez e o remate do ruta arredor do
territorio vital da poeta de Padrón son a aposta do Festival Rosalía
da área de Cultura da Deputación da Coruña que chega á súa
cuarta edición na Rede.
Así,
está previsto que ao longo deste 24 de febreiro o Festival Rosalía
achegue “novas visións ao redor da escritora”, desta vez da man
da música Uxía e da escritora María Reimóndez, co seu vídeo
360º. Nesta xornada tamén chegará ao seu remate a serie
divulgativa #Rosalía7lugares, que desvelou espazos de
especial relevancia para a autora de Follas Novas, como o
lugar de Camiño Novo, Ortoño, o Liceo de la Juventud ou Muxía,
entre outros.
“A
nova proposta na Rede está a sorprender con iniciativas distintas
que levan á escritora a novas linguaxes e soportes e demostran o
actual e poderosa que é a obra e a figura de Rosalía de Castro,
unha verdadeira fortuna para a cultura galega”, sinala o deputado
de Cultura, Xurxo Couto que participa hoxe nos actos oficiais
organizados pola Fundación Rosalía en Santiago de Compostela.
Até
o momento realizáronse máis dunha ducia publicacións, entre as que
se atopan vídeos de escritoras e artistas como Rosalía Fernández
Rial ou Larraitz Urruzola, así como doutras creadoras como Zaza
Ceballos, Iria Ribadomar ou Sandra de Rego, que nos falaron da
vixencia e a influencia da obra de Rosalía hoxe en día.
Ademais,
nesta nova edición deuse inicio á serie de publicacións
#Rosalía7lugares para coñecermos diferentes localizacións
relevantes relacionadas coa vida da autora.
Nos
días seguintes, e até o día 3 de marzo, irán publicándose novas
achegas e coñecendo novas perspectivas sobre Rosalía, como a da
escritora Antía Yáñez, das músicas Guadi Galego ou Aid, así como
do mundo do teatro, da man de Tero Rodríguez e Nate Borrajo, ou da
creación, como a iniciativa Rosalía pioneira de Punto e
coma, ou as de OZOCOgz e Rei Zentolo.