A Coruña salienta as vantaxes do seu proxecto Smart City de cara á cidadanía e as empresas TIC
luns, 19 de novembro do 2012
- O tenente de Alcalde, Martín Fernández Prado, nunha presentación recente da iniciativa
Entre
as distincións que o Colexio Profesional de Enxeñaría en
Informática de Galicia (CPEIG)
entregará na súa cita do 23 novembro, atópase unha que vai
dirixida a unha administración galega: o Concello da Coruña, a quen
recoñecen os enxeñeiros polos “seus
esforzos en materia de fomento da cidadanía dixital”.
Máis polo miúdo, a plataforma que preside Fernando Suárez
concedeulle ao Goberno da cidade herculina o Premio
Iniciativa da Administración polo
Proxecto
Coruña Smart City.
Este recoñecemento inscríbese dentro dos galardóns que concede
anualmente no transcurso da Noite da
Enxeñaría en Informática de Galicia,
prevista como dixemos para o 23 de novembro.
O
CPEIG quere con este galardón facer un recoñecemento público a
aposta que o concello coruñés está a realizar pola I+D+i e as
novas tecnoloxías, “dous desafíos
esencias para o desenvolvemento económico e social da cidade
herculina, e de Galicia en xeral”.
Segundo
salienta a carta remitida polo ente colexial ao alcalde da Coruña,
Carlos Negreira, para comunicarlle a concesión do premio, “a
sensibilidade tecnolóxica amosada avala á Coruña como a primeira
cidade galega que forma parte da Rede Española de Cidades
Intelixentes”.
O
Concello da Coruña, pola súa parte, está a recibir a nova con gran
satisfacción, xa que certifica, segundo sinala o tenente de Alcalde
de Medio Ambiente, Territorio e Infraestruturas, Martín Fernández
Prado, que o camiño escollido e percorrido é o correcto. Ao
seu xuízo, todo o proxecto ten a mellora da calidade de vida da
cidadanía e a potenciación das empresas TIC entre os seus
obxectivos principais. A continuación,
reproducimos a nosa conversa recente co tenente de Alcalde.
- Que constitúe este
premio para os responsables deste proxecto?
- Unha satisfacción, un
reto e un acicate. Unha satisfacción porque amosa que o camiño
escollido e o percorrido que levamos feito parece o correcto.
Estannos a avalar entidades alleas á política, á xestión
municipal e mesmo alleas á Administración pública. Dalgún xeito
significa que o proceso marcado polo Goberno municipal: Axenda
Dixital, Proxecto Smart Coruña e Plan Director das TIC no Concello
da Coruña é o camiño correcto a seguir.
- En liñas xerais,
que vai significar esta experiencia para A Coruña e, por extensión
para o futuro das cidades conectadas? Galicia, a través da
experiencia coruñesa, pode ser referente mundial en espazos urbanos
dixitais?
- O Goberno municipal da
Coruña concibe un proxecto cos seguintes obxectivos:
Un proxecto de I+D+i que
proporcionará infraestruturas experimentais de investigación na
Internet do futuro / Internet das cousas.
Un proxecto de apoio á
I+D da Universidade da Coruña, que favorecerá a súa
internacionalización.
Un proxecto concibido
para o desenvolvemento e a internacionalización do sector TIC.
Un proxecto cun potente
efecto tractor: desenvolvemento socioeconómico, atracción de
investimentos foráneas, innovación, etc.
Un proxecto para a
potenciación da Coruña como polo tecnolóxico TIC de Galicia.
Un proxecto que permitirá
dispoñer, na Coruña, dunha infraestrutura para novos proxectos de
I+D e para novos desenvolvementos tecnolóxicos.
Un proxecto para o
emprego e a xeración, retención e vinculación de talento.
Un proxecto focalizado
cara á creación de novas empresas, orientación á excelencia das
existentes, apoio á innovación e fomento da verdadeira
clusterización do sector.
Pensamos que o proxecto
terá impacto no conxunto da área territorial da Coruña
metropolitana, reestruturará o rol da Coruña no sistema urbano de
Galicia e do norte de Portugal e incidirá favorablemente no
despregamento da Axenda Dixital do Eixo Atlántico.
- A nivel de cidadáns,
que beneficios van atopar a través de Coruña Smart City? E a nivel
de empresas? Cando comezaremos a ver os primeiros froitos da
experiencia?
- O noso proxecto
caracterízase por ter á cidadanía no centro do sistema. Isto faise
para mellorar a calidade de vida da nosa sociedade, para optimizar os
servizos públicos que se lle prestan. Doutro xeito (a tecnoloxía
pola tecnoloxía) non tería ningún sentido. O Goberno da Coruña
impulsa un proxecto que dotará de modelo e impulsará a nosa
concepción da Administración Electrónica, que persegue a xestión
integrada da cidade, sobre a base da construción física e lóxica
dun Centro integral de xestión da información urbana concibido para
implementar unha ferramenta de coñecemento da cidade (escoitar e
comprender) e de pilotaxe da súa dirección estratéxica, xestionada
por Cadros de Mando (Balanced scorecard). Un proxecto que
apoie o establecemento de confianza dixital na poboación coruñesa.
Estamos a elaborar unha normativa sobre desenvolvemento da
Administración Electrónica, a transparencia e a reutilización da
información no sector público, sobre a presenza institucional en
Internet, etc.
Pensamos que os primeiros
froitos da experiencia xa se están a ver: presentáronse sete
ofertas que aglutinan o coñecemento de 84 empresas e entidades
públicas e privadas. Xa estamos a acadar que o sector TIC coruñés
e galego busque alianzas estratéxicas para medrar, para se
internacionalizar, para lograr a excelencia.
Os cidadáns verán
claras melloras ao longo do 2013 co desenvolvemento de normativa que
facilite o despregamento da Administración Electrónica e percibirán
melloras directas na prestación dos servizos públicos dende
mediados do 2013. Ademais, mellorar a eficacia dos servizos implica
xestionalos mellor, aforrar o que permitirá que medre outro tipo de
gasto mais necesario nestes momentos.
- O CPEIG valorou a
sensibilidade tecnolóxica amosada polo Concello herculino, unha
predisposición que a levou a converterse na “primeira cidade
galega que forma parte da Rede Española de Cidades Intelixentes”.
A que responde esta sensibilidade?
- A Coruña é fundadora
da RECI, lidera o seu Grupo Técnico de Innovación Social. A Coruña
é, dende hai escasas semanas, vicepresidenta do Buró Executivo da
Conferencia de Cidades do Arco Atlántico (que agrupa a máis de 100
entidades da cornixa atlántica europea) e lidera o Comité Técnico
de Smart Atlantic Cities. A Coruña preside a Comisión de
Planeamento, Infraestruturas e Territorio do Eixo Atlántico do
Noroeste Peninsular (onde se dirixe a Axenda Dixital do Eixo).
Semella evidente que esta sensibilidade responde a un principio:
cremos firmemente no papel das cidades para tratar de saír do
contexto actual de crise e cremos na potencialidade das TIC para dar
pulo á nosa cidade.