A Coruña presenta nova web de Seguridade Cidadá
martes, 7 de marzo do 2017
Coruña ten nova
páxina web de Seguridade Cidadá, un sitio en liña dirixido a
acrecentar e amplificar a comunicación coa cidadanía en materia de
servizos de protección e atención (a propia área municipal de
Seguridade Cidadá, Bombeiros, Policía Local e Protección Civil). A
nova web foi dada a coñecer polo alcalde Xulio Ferreiro, que
salientou que partilla o mesmo principio que todas as iniciativas
dixitais do actual Goberno local, o principio de transparencia.
Nun plano máis concreto, recordou que a canle acabada de presentar é
un complemento do Portal Municipal de Transparencia, en activo desde
principios deste ano.
O alcalde, que estivo acompañado durante a
presentación do coordinador de Seguridade Cidadá do Concello,
Carlos García Touriñán, explicou que a nova web é unha “páxina
viva”, que se irá modificando no día a día e ampliando para ser
“unha ferramenta útil á cidadanía”, onde de maneira progresiva
iranse introducindo novos datos ás distintas seccións, como son os
apartados específicos dos servizos de Policía Local, os Bombeiros e
Protección Civil. Segundo fixo saber, con esta nova páxina
“tensouse abrir unha nova porta á comunicación e a participación,
que sexa máis cómoda, máis rápida e máis sinxela, para que a
veciñanza poida acceder aos servizos que presta o Concello con máis
facilidade”.
Nun plano máis concreto, sinalou que a través
das súas seccións, a nova páxina municipal fornece, “de maneira
sistematizada”, información sobre trámites, programas, novas
sobre a actividade, avisos ou documentación, como as memorias de
xestión de cada un destes ámbitos, ademais da organización interna
dos servizos e os teléfonos e información de contacto.
Ademais, Ferreiro e García Touriñán sinalaron
que “cada sección conta con apartados específicos como é, no
caso da Policía Local, o das campañas que esta desenvolve, de xeito
individual ou en colaboración con distintos organismos”. Cada
sección, engadiron, “inclúe todos os datos das mesmas, para que
sexan realmente accesíbeis, xa que ese é o obxectivo, que a
cidadanía poida coñecer todo o traballo, para mellorar a seguridade
viaria”.
Amais do devandito, explicaron que a páxina
incorpora información sobre diversos programas innovadores, como o
programa PIPE, de Identificación Policial Eficaz, ou o programa
Axente Titor, que se realiza en coordinación coas comunidades
educativas e que esta especializado na promoción do respecto polos
dereitos da nenez, e centrado nos ámbito da protección do menor e
en concreto ámbito escolar.
De igual xeito, a páxina inclúe unha sección de
obxectos perdidos, "unha sección moi demandada pola cidadanía",
segundo advertiu García Touriñán, e na que se dará conta das
pertenzas depositadas na Policía Local.