A Coruña activa a súa plataforma en liña de contratos
luns, 26 de decembro do 2022
O concelleiro José Manuel Lage, presentou este
luns 26 de decembro a nova
plataforma de contratos do Concello da Coruña, que xa está
dispoñíbel en liña.
Trátase, dixo, dunha ferramenta de rexistro público que se pode
empregar de “maneira sinxela e intuitiva” e que sitúa á Coruña
á cabeza de Galicia en materia de transparencia e Administración
Electrónica, dixo, ao tempo que salientou as facilidades que pon en
xogo a plataforma, que permite consultar en tempo real os contratos
da administración e os procedementos seguidos para a súa
adxudicación.
Esta plataforma, engadiu, permite filtrar por
expedientes, por data e importe de licitación, por tipo de contrato
e por procedemento: “Hoxe damos un paso na transparencia do
Concello, un paso que non ten marcha atrás, coa posta a disposición
da cidadanía dunha ferramenta na que se poden consultar todos os
contratos da administración municipal desde o 2018”.
Tamén destacou que o Concello da Coruña xa
contaba cunha boa valoración en materia de transparencia, cun 88 de
valoración no último informe elaborado pola Universidade de
Santiago. "Incrementamos o noso compromiso coa transparencia con
esta nova ferramenta, que permite mellorar notablemente o acceso á
información por parte da cidadanía e o seu coñecemento dunha
materia tan relevante como é a contratación", dixo José
Manuel Lage.