A Coruña acolle este venres un encontro sobre innovación para emprender e desenvolver: o Foro +I+D+C
xoves, 1 de decembro do 2016
Este venres celébrase na Coruña un encontro
destinado a visualizar, de cara a servir de referentes e impulsar a
posta en marcha de novos proxectos, as nosas capacidades actuais en
materia de emprendemento, desenvolvemento e, por suposto, innovación.
Falamos do
Foro +I+D+C, que se levará a cabo no Paraninfo da Universidade
da Coruña, en horario de 10:00 a 14:00 e que inclúe dúas mesas
redondas (Innovación e Emprendemento, por unha banda, e
Innovación e Desenvolvemento, pola outra), con algúns dos
principais representantes do noso tecido tecnolóxico de vangarda.
Intervirán, entre outros, os representantes de R, Nasas, Texas
Controls ou Confirmsign.com. Organiza a Fundación Universidade da
Coruña en colaboración coa Deputación e co Concello.
As actividades comezan ás 10.00 coa apertura do
foro en si mesmo, na que intervirán Xulio Ferreiro, alcalde da
Coruña, Julio Abalde, reitor da UDC, Valentín González, presidente
da Deputación, e Antonio Abril, presidente do Consello Social da UDC
e secretario xeral de Inditex. A continuación será a presentación
do comité organizador e, ao fío das 11.00 horas, comezará a
primeira das mesas redondas, na que intervirán Ricardo Álvarez
(director de Desenvolvemento e Negocios Internacionais de
Netex), Nerea Sánchez Rocha (responsábel de Administración e
Xestión de Proxectos de Cetim), Roberto Fraga (director executivo e
fundador de Pilgrim Global Solutions), Fátima Carmena (directora de
Proxectos de Márketing de Nasas) e Alberto Lema Suárez (concelleiro
de Emrpego e Economía Social da Coruña).
Arredor das 12.30 e logo dunha pausa para o café,
comezará a segunda das mesas contando coa presenza de Antonio
Rodríguez Del Corral (director de Innovación e
Desenvolvemento de Negocio de R), José Valiño Blanco (director
xeral de IT, Procesos e Operacións de Abanca), Frank Fernández
(director executivo e fundador de Texas Controls), Frankie Gómez
(director executivo e fundador de Confirmsign.com) e Horacio Naveira
(Vicerreitoría Investigación e Transferencia da UDC).