A Confederación Pirata comeza a dar forma á listaxe de seu para as eleccións ao Parlamento Europeo
martes, 7 de xaneiro do 2014
A Confederación
Pirata, unión dos diferentes Partidos Pirata do Estado, abriu
este luns 6 de xaneiro o seu proceso de elección da listaxe de
representantes para as eleccións ao Parlamento Europeo en 2014. O
proceso, que a Confederación cualifica de “transparente, aberto e
plenamente democrático”, en consonancia cos valores que fixeron
posíbel esta agrupación política (a aplicación a tódolos niveis
dos valores que alentan os movementos de liberdade en liña,
ciberactivismo e software libre, entre outros), fica aberto tanto a
simpatizantes como a afiliados dos partidos da Confederación Pirata.
Segundo informan,
calquera interesado poderá presentar a súa candidatura e, á súa
vez, votar entre aquelas que lle parezan máis axeitadas. Desa
maneira a Confederación ofrece a todas as persoas “a posibilidade
de participar plenamente na política reflectindo así a nivel
interno o seu defensa da democracia directa”.
A votación realizarase
en dúas fases, unha para a elección do tres primeiros candidatos e
outra para o resto da listaxe. Ademais, os pre-candidatos realizarán
unha campaña electoral pública durante dúas semanas para abrir
aínda máis o proceso. Este proceso concluirá o 23 de marzo coa
presentación da lista electoral completa durante a primeira asemblea
xeral da Confederación Pirata.