A Catedral de Santiago achega aos fieis de todo o mundo un lampadario en liña
luns, 18 de xullo do 2016
A Catedral de Santiago
vén de impulsar unha iniciativa tecnolóxico-social, participativa e
interactiva para achegar, en palabras da Fundación do mesmo nome, “o
santuario xacobeo a todas as persoas, en calquera recanto do mundo”.
Trátase, máis polo miúdo, da posta en marcha (dende hoxe mesmo)
dun lampadario en
liña a disposición de todos fieis que lles permitirá prender
unha candea ao Apóstolo Santiago.
Segundo informa a
Fundación Catedral de Santiago, poderemos acender unha lámpada de
maneira virtual dende un computador ou dende un dispositivo
intelixente (smartphone), esteamos onde esteamos.
Por certo que a candea
que prendamos ficará acesa 48 horas. Unha vez acesa, poderemos
compartila para que outras persoas axuden a mantela e “que non se
apague”, explica a devandita entidade, que engade que o servizo
permite compartir a nosa candea en redes sociais. Respecto do
funcionamento da ferramenta, dicir que abonda con acender velas na
devandita web e escribir unhas intencións ou oración, para que
acompañe o proceso de acendido.