A Cátedra Telefónica da UVigo celebra unha década de logros formativos e investigadores
venres, 16 de xuño do 2023
A Cátedra Telefónica da Universidade de Vigo vén
de cumprir dez anos de andaina e este xoves 15 compartiu algúns dos
seus principais fitos, da man do reitor, Manuel Reigosa, e da
directora de Telefónica de España en Galicia, Paula Beirán. Entre
os grandes logros da Cátedra figura, ao seu xuízo, o acadado no
pasado mes de maio cando, por segundo ano consecutivo, dous dos
estudantes da UVigo, Pablo García e Martín Blanco, gañaron o LEDU
STEM Cátedras Telefónica, un torneo para estudantes STEM (Ciencias,
Tecnoloxía, Enxeñería e Matemáticas) promovido por Telefónica e
a Liga Española de Debate Universitario (LEDU). Reigosa
e Beirán tamén aproveitaron para renovar a colaboración que fai
posíbel a Cátedra.
O acto de sinatura, celebrado no despacho do
reitor e no que se contou coa participación do catedrático José
Cidrás, coordinador desta cátedra na UVigo, serviu tamén como
recepción aos gañadores do torneo LEDU STEM, Pablo García e Martín
Blanco, que agradeceron o convite e os agasallos que lle foron
entregados tanto por parte de Telefónica como da UVigo. Tras
felicitar a estes alumnos polos “excelentes resultados” acadados
nunha competición na que participaron 19 universidades de todo o
territorio nacional, Paula R. Beirán expresou a satisfacción de
Telefónica pola colaboración coa UVigo a través desta cátedra e a
vontade da compañía de continuar a liña de traballo desenvolta ao
longo de todos estes anos.
O reitor admitiu estar “moi satisfeito” cos
resultados que se están a acadar e, neste sentido, amosouse
convencido de que “a Universidade ten que medrar a través da
colaboración público-privada”, ao que engadiu que “ao longo
destes dez anos foron xurdindo diferentes iniciativas exitosas que
fan que a nosa Universidade sexa mellor”.
Polo que respeta ao torneo LEDU STEM Cátedras
Telefónica, lembraron que ten como obxectivo fomentar as habilidades
transversais (soft skills) nos futuros líderes dixitais, e a
Cátedra da Universidade de Vigo non só o gañou en dúas ocasións,
senón que na súa primeira edición quedou tamén finalista, “un
éxito sen precedentes entre a rede española de Cátedras
Telefónica”, explicaron, recordando que desta volta os
responsábeis deste éxito foron os estudantes de enxeñaría Martín
Blanco Prego e Pablo García Salgado, membros da asociación Retórica
UVigo, que acudiron á competición como integrantes do equipo da
Cátedra Telefónica Espacio de Innovación, que se impuxo ao da
Cátedra Telefónica Intelixencia na Rede, da Universidade de
Sevilla, nunha final celebrada en Madrid o pasado 12 de maio e na que
debateron sobre se a dixitalización é ou non unha aliada da
transición verde.
Múltiples actividades en 10 anos de Cátedra
Telefónica na UVigo
Telefónica constituíu na Universidade de Vigo a
súa cátedra homónima hai xa dez anos, co obxectivo de promover a
aplicación das Tecnoloxías da Información e as Comunicacións
(TIC) no ámbito do ensino universitario, a investigación e a
innovación. Ao longo destes anos desenvolveu obradoiros e
conferencias de interese para os alumnos (talleres de Arduino,
xornada smart energy-smart city, seminarios sobre a plataforma
MiríadaX e os MOOCs, etc) e participou, entre outros, no Foro
Tecnolóxico de Emprego, o congreso Smart Cities and Communities ou
no encontro Hack for Good.
A día de hoxe Telefónica ten cátedras en 25
universidades españolas. Cada unha delas mantén a súa
especialización, pero o obxectivo común é que a rede se constitúa
como unha sorte de Think Tank de referencia no
estudo do impacto das TIC na sociedade, sendo un dos seus obxectivos
prioritarios a divulgación e comunicación dos resultados máis
relevantes.