A Cátedra Feminismos 4.0 financia cinco proxectos para combater o machismo dixital
martes, 2 de agosto do 2022
A
Cátedra Feminismos 4.0 Depo-UVigo, impulsada pola Deputación de
Pontevedra e a Universidade de Vigo para impulsar iniciativas coas
que combater a fenda dixital de xénero, destina
24.772 euros a financiar cinco proxectos de investigación centrados
en estudos feministas e de xénero nun contexto tecnolóxico. A
convocatoria, que se abriu o pasado mes, está destinada a grupos e a
persoal investigador doutor dos campus de Vigo e Pontevedra e,
finalmente a comisión avaliadora seleccionou estas cinco iniciativas
que se centran principalmente nas redes sociais, aínda que tamén
abordan outras temáticas como a ciencia climática ou o industria do
videoxogo.
Segundo
informaron a Deputación e a UVigo, un dos obxectivos destas axudas é
“contribuír a reducir o desequilibrio entre homes e mulleres
dedicados á I+D no sistema universitario galego”. Por este motivo,
para a resolución destas axudas valorouse o peso relativo que as
mulleres teñen nas propostas presentadas, “de xeito que se
potencia o seu número e a calidade do seu traballo”, como se
recolle nas bases. Finalmente, a comisión avaliadora seleccionou coa
puntuación máxima de 10 puntos, o proxecto Unha mirada feminista
á alborada da ciencia climática: Pescuda, interpretación,
valoración e réplica dos experimentos e achegas de Eunice Newton
Foote en 1856. Esta iniciativa, liderada por Elena Alonso,
directora da Escola de Enxeñaría de Minas e Enerxía, recibirá
unha achega de 5884,20€.
Cunha
puntuación de 9,3, tamén forma parte deste programa de axudas o
proxecto Toxicidade e violencias machistas en Instagram.
Incidencia e percepción entre o alumnado da Universidade de Vigo,
liderado polo profesor de Ciencias Sociais e da Comunicación Xabier
Rolán, que recibirá 5472,42€.
O
xurado tamén seleccionou, cunha valoración de 8,2 puntos, a
investigación Identificación automatizada de comentarios
sexistas en las redes sociales, mediante técnicas de IA. Taller
demostrativo en institutos de secundaria del área de Pontevedra.
A proposta de Ana Fernández Vilas, investigadora da Escola de
Enxeñaría de Telecomunicación, será financiada con 4825,14€.
Case coa mesma puntuación, 8,1, foi seleccionado o proxecto As
que están e as que marcharon: Mulleres e migracións na industria do
videoxogo que poderá ter unha axuda de 4766,30€ da man de Sara
María Torres. Finalmente, o estudo Carapuchiña e a pantalla
feroz: identidades de xénero nas redes sociais, liderado pola
catedrática da Facultade de Filoloxía e Tradución Veljka Ruzicka
acadou unha puntuación de 6,5 e recibirá 3824,81€.