A Cámara de Comercio de Santiago impulsará a eAdministración entre as PEME e os autónomos
luns, 22 de xuño do 2015
A
Cámara de Comercio de
Santiago de Compostela vén de pór en marcha un programa sobre
ferramentas tecnolóxicas para facilitar as relacións
(comunicacións, tramitacións, procedementos) coas entidades
públicas das pequenas e medianas empresas galegas, das microempresas
e dos autónomos. O Programa eAdministración, iniciativa
cofinanciada por fondos FEDER da Unión Europea, ten como obxectivo
específico fomentar servizos e ferramentas como a facturación
electrónica ou a sinatura dixital, mellorando así a produtividade e
competitividade dos usuarios a través de servizos electrónicos
completos.
Para
isto, o plan impulsará que as empresas adopten metodoloxías para
incorporar a Administración Electrónica de modo sistemático a súa
actividade empresarial cotiá.
Este
programa ten unha fase de consultoría de mellora de procesos onde se
realizará un diagnóstico asistido e personalizado ás empresas
participantes. Trátase dun estudo dos procesos da empresa para
determinar os aspectos nos que a eAdministración pode contribuír á
mellora das súas produtividade e competitividade, facilitando a
redución de cargas administrativas, a axilidade nos procesos coas
entidades públicas, a automatización de tarefas que incorporen
evidencias electrónicas certificadas (sinatura dixital, selo de
tempo, notificacións electrónicas certificadas...) que garantan a
súa seguridade xurídica de e a posibilidade de integrar a
facturación electrónica.
Feito
o diagnóstico, elaborarase un documento de optimización de
metodoloxías que exercerá de “guía para a fase de implantación
en plataforma de servizos”. Nesta fase, informa a Cámara, “a
empresa beneficiaria poderá realizar trámites coas administracións,
facturar electronicamente, automatizar procesos internos e realizar
transaccións mercantís coas certificacións xurídicas necesarias”.
O custe da implantación destas solucións será dun máximo de 1.000
euros.