A Cámara de Comercio de Santiago guía a creación e afianzamento de 22 proxectos innovadores
martes, 19 de maio do 2015
O viveiro de empresas da
Cámara de Comercio de Santiago (Polígono de Costa Vella) acolleu
este luns a
presentación do Programa de Creación e Consolidación de Empresas e
Autoemprego, que se celebrará ata o vindeiro 10 de xullo. Esta
acción, unha liña de traballo formativo, foi debullada nos seus
detalles polo presidente da entidade, Jesús Asorey, quen fixo saber
que o obxectivo é achegar recursos que permitan desenvolver un plan
para dar forma a unha empresa competitiva, eficiente e innovadora. “A
elaboración desta guía de mellora da PEME servirá aos
emprendedores como medio de argumentación da súa viabilidade ante
entidades públicas e financeiras”.
A iniciativa está
dirixida sobre todo a persoas con iniciativas emprendedoras que
necesiten coñecer a viabilidade da súa idea de negocio e adquirir
os coñecementos necesarios que lles permitan pór en marcha os seus
proxectos. Participarán un total de vinte e seis alumnos que
desenvolverán catorce proxectos de creación e oito de consolidación
empresarial, centrados nos sectores da construción, química,
aplicacións móbiles, dispositivos médicos, sector nupcial, téxtil,
servizos web, exportación comercial, recursos humanos, gastronomía
ou mesmo servizos xurídicos.
O programa está deseñado
cunha metodoloxía teórico-práctica, que se impartirá en sesións
de formación xenérica e conxunta e a través de clases específicas
e á medida durante unha consultoría semanal e individualizada, coa
axuda dun equipo de profesionais con ampla experiencia docente e
homologados polo INCYDE (entidade colaboradora do programa) como
formadores. Durante as oito semanas da formación, os alumnos
recibirán nocións sobre dirección de proxectos, mercadotecnia,
promoción e comercialización, creatividade, innovación e
transferencia de tecnoloxía, xestión da información e manexo de
redes sociais, xestión xurídica e financeira, prevención de riscos
laborais e calidade medioambiental.