A Cámara da Coruña e GAIN coinciden na necesidade de dar enerxía á transformación empresarial
xoves, 28 de abril do 2022
A
directora de GAIN, Patricia Argerey, mantivo unha reunión este
mércores 27 de abril con Antonio Couceiro e os membros do comité
executivo da Cámara da Coruña. Argerey e os integrantes da entidade
cameral coincidiron na importancia da colaboración público-privada
para impulsar accións empresariais relacionadas coa I+D+i e
lembraron algúns dos principais fitos de transformación de GAIN e a
Cámara da Coruña, que desenvolven un “intenso labor enfocado ao
impulso da innovación nas empresas, especialmente nas pemes”.
Couceiro
explicou que a Cámara, a través dos programas europeos que
xestiona, ofrece asesoramento, formación e axudas a nivel nacional e
internacional, en sectores como o turístico, o do comercio e o
industrial, entre outros. Amais, a través da Oficina Acelera Peme, a
entidade ofrece asesoramento sobre o programa Kit Dixital, que ten
como obxectivo “promover a dixitalización de pequenas empresas,
micropemes e persoas autónomas”.
Antonio
Couceiro destacou “a importancia de que as empresas poñan o foco
no desenvolvemento de procesos dixitais e innovadores, tanto nas
pemes como nas industrias. É o momento de aproveitar o enorme salto
cualitativo que experimentamos nos últimos dous anos neste sentido”.
A
directora de GAIN, pola súa banda, expuxo que o Executivo galego
está “firmemente comprometido coa transformación do modelo
económico de Galicia cara a unha economía competitiva e
sustentábel, baseada no coñecemento e no talento, que acelere o
crecemento económico e impulse o emprego e o benestar social”.
Para iso, apuntou que “é necesario que o tecido produtivo se
convenza das vantaxes económicas de investir en I+D+i tanto a curto
como a longo prazo, máxime nun contexto de incerteza e dificultade
como o actual”.
Precisamente,
para responder o reto da transformación enerxética e dixital, a
Xunta de Galicia acaba de aprobar a súa Estratexia de
Especialización Intelixente de Galicia 2021-2027, que mobilizará
5.000 millóns para facer da sustentabilidade, a dixitalización e as
persoas os eixos das súas políticas de I+D+i.
Os
membros do comité executivo da Cámara da Coruña trasladaron á
representante autonómica posíbeis vías de colaboración en
sectores como o do medio ambiente, o marítimo, da madeira, do gas,
da distribución ou do alimentario.
Neste
contexto, lembraron que a Oficina de Promoción Tecnolóxico
Industrial da Cámara, que verá a luz en datas vindeiras, ten como
obxectivo principal revitalizar a atractivo da área para a
localización de novas iniciativas con potencial innovador e de
crecemento e mellorar a competitividade das xa instaladas.