A CIG pon en marcha unha web sobre a folga xeral do 27 de xaneiro
martes, 11 de xaneiro do 2011
A Confederación Intersindical Galega vén de
estrear unha páxina web sobre a convocatorio de folga xeral. A
proposta en liña, tal e como conta a propia CIG
nun comunicado, diríxese a ampliar o radio alcance de toda a información
xerada ao abeiro do sindicato galego: obxectivos, actividades a desenvolver,
convocatorias, manifestos, etc. Nesta liña, a nova web céntrase polo miúdo na
vindeira folga xeral do 27 de xaneiro, repasando as mobilizacións “máis importantes organizadas pola central no
contexto da crise económica”. A face en liña é en si mesma un xeito de
afrontar o parón produtivo que estamos a vivir.
De feito, pon a disposición dos internautas o
material preciso para “entender a actual
ofensiva do capital contra a clase obreira”, amais de axudar a desbotar a
información que lanzan dende axentes interesados para explicar, na súa versión,
a perda de dereitos sociais e laborais.
A web, que se lanza co epígrafe En defensa das pensións e do emprego (o
lema da folga xeral do 27), inclúe tamén unha sección de descargas con toda a
información xerada pola CIG sobre cuestións como a reforma laboral e das
pensións. “Alén disto”, sinala o
sindicato, “tamén é posíbel consultar un
repaso histórico polas anteriores folgas xerais convocadas polo sindicalismo
nacionalista en defensa dos intereses dos traballadores e traballadoras e
baixar todo o material editado pola central nos últimos tempos”.