A CEP organiza os días 9 e 10 dúas xornadas sobre as vantaxes do dixital na empresa

A Confederación de Empresarios de Pontevedra vai organizar á saída da ponte da Constitución dúas xornadas gratuítas sobre as vantaxes das ferramentas dixitais nas empresas de tódolos sectores e métodos para tirarlles o máximo partido. A primeira cita será en Vilagarcía de Arousa, o día 9, na sede que o CEP ten na rúa Alexandre Bóveda. Esta xornada dará comezo ás 19.00 horas. A segunda desenvolverase na Estrada, na sede da Asociación Comarcal de Empresarios da localidade (Avenida de Santiago) a partir das 20.15 horas.
Ámbalas dúas contarán coas intervencións dos directores de Indicade (Lino Álvarez) e de Sistemas AFI (Adolfo José Fragueiro) afondando –entre outras cuestións- nos beneficios das novas tecnoloxías do coñecemento como medio para acadar máis produtividade e na oferta de software libre e propietario que máis potencial ten para adaptarse ás circunstancias das empresas galegas.
Para solicitar máis información sobre estas actividades ou formalizar as inscricións, cómpre poñerse en contacto coa Confederación de Empresarios de Pontevedra a través do teléfono 986 439 611 ou ben mediante a conta de correo innovacion@cep.es.