A AAAG e o Concello da Coruña celebran a María Casares cun podcast biográfico
mércores, 15 de xuño do 2022
A
Asociación
de Actores e Actrices de Galicia (AAAG) e o Concello da Coruña van
render homenaxe á actriz María Casares, no ano do seu
centenario, con diferentes actividades a pé de rúa e, tamén, a
pé de Rede. O obxectivo destas accións, sinalaron, “é
apoiar a dinamización da exposición retrospectiva sobre a actriz
que acolle Quiosco Alfonso até o vindeiro 24 de xullo”. Inclúese
un roteiro polas as rúas da Coruña na que medrou María Casares e a
gravación dun podcast
biográfico en tres sesións que se celebrarán no propio Quiosco. As
dúas actividades desenvolveranse abertas ao público e contarán coa
participación de actores e actrices.
O
roteiro disporá de dúas convocatorias, celebrándose a primeira
delas este sábado, 18 de xuño. A ruta urbana, que transitará por
espazos de especial significado nos primeiros anos de María Casares,
estará guiado polo historiador Emilio Grandío e a investigadora
María Lopo e contará coa participación do actor Gonzalo Uriarte,
quen se encargará de ler diferentes cartas que Santiago Casares
Quiroga escribiu á súa filla, María Casares. Pola súa banda,
Matilde Blanco poralle voz á propia Casares ao ler fragmentos das
súas memorias Residente Privilexiada. O punto de saída será a
Casa Museo Casares Quiroga (Rúa Panaderas, 12) ás 12.00 h. A
segunda convocatoria será o sábado 2 de xullo.
Cada
un dos roteiros, que ten unha duración aproximada de dúas horas,
conta cun total de 30 prazas e para participar neles cómpre a
inscrición previa a través do formulario na
web da asociación. A reserva de praza será por estrito orde de
inscrición e cada inscrición será individual.
Podcast
biográfico
A
segunda das actividades que organiza o Concello da Coruña coa
colaboración da Asociación de Actores e Actrices de Galicia (AAAG)
leva por título María Casares: da Coruña a Residente
privilexiada. Tratarase da gravación dun perfil biográfico a
través da presentación de María Lopo, comisaria da exposición
María Casares, actriz océano. Itinerario dunha exiliada,
e a lectura dramatizada de diferentes actrices de textos importantes
na traxectoria da célebre interprete nacida na Coruña en 1922.
A
gravación, que se desenvolverá aberta ao público, dividirase en
tres sesións que se celebrarán os martes 5, 12 e 19 de xullo ás
19,00 horas no auditorio do segundo andar do Quiosco Alfonso. Cada
unha destas sesións centrarase nun aspecto fundamental de María
Casares: a infancia na Coruña, o exilio e o teatro.