A 5G, a ciberseguridade e a IA centrarán a terceira edición da Demoweek de Gradiant
martes, 19 de xullo do 2022
Entre
o tres e 7 de outubro, o
Centro Tecnolóxico Gradiant vai celebrar a terceira edición do seu
DemoWeek, co obxectivo de mostrar os últimos avances en
conectividade, intelixencia e seguridade. Será unha axenda de
actividades de portas abertas, dende a súa nova sede, dirixidas a
empresas e profesionais. Segundo confirmou Gradiant, nestas xornadas
prestarase especial atención aos sistemas aéreos non tripulados e
a industria intelixente.
As
actividades previstas desenvolveranse xunto aos socios do
centrovigués nos diferentes consorcios e centros tecnolóxicos
nacionais e internacionais. Esta DemoWeek continúa a senda que
iniciou a organización en 2019, cando, segundo lembra Gradiant, o
evento converteuse “nunha cita imprescindíbel” para coñecer as
novas tendencias no ámbito da investigación e desenvolvemento de
tecnoloxías.
Como
en anteriores edicións o evento adicará unha das xornadas á
conectividade. Ese día, as redes 5G serán as protagonistas dos
paneis e demostracións. A Intelixencia Artificial tomará o relevo e
ao abeiro desta temática debullaranse iniciativas tan destacadas
como o proxecto europeo PERSIST, coordinado por Gradiant. En materia
de ciberseguridade, porase o foco nos proxectos Valida, SafeGate ou
Impulse.
No
evento participarán profesionais do sector como relatores ou
colaboradores nos diferentes paneis e mesas redondas. Algunhas destas
persoas expertas nos ámbitos de seguridade, a intelixencia e a
conectividade traballan para outros centros tecnolóxicos socios dos
consorcios cos que Gradiant investiga e desenvolve as diversas
solucións tecnolóxicas.
Coa
DemoWeek 2022, Gradiant afianza unhas xornadas de portas abertas que
se celebran desde 2019. No evento que se organizou o ano pasado de
maneira virtual (debido á situación sanitaria) participaron case
200 persoas. “A DemoWeek é a cita anual en Galicia para aqueles
profesionais que desexen descubrir cales serán as tecnoloxías nas
que se apoiarán as empresas e entidades para afrontar os retos
presentes e futuros”, engaden fontes de Gradiant.