69 proxectos de 14 comunidades autónomas concorren ós Premios Fundetec

Ata un total de 69 proxectos veñen de presentarse como candidaturas á III edición dos Premios Fundetec que, fundamentalmente, teñen o obxectivo de recoñecer aquelas iniciativas que fomenten o desenvolvemento da Sociedade da Información, o emprego das Tecnoloxías da Información e a Comunicación (TIC) e a reducción da fenda dixital en España.
Os proxectos presentados proceden de 14 comunidades autónomas entre as que destacan Madrid, con 20 proxectos presentados e Cataluña con 11. Galicia, ó igual que a Comunidade Valenciana, presenta 3 proxectos.
No que respecta ás categorías, o maior número de candidaturas recibidas corresponde á denominada Proxectos de Entidades Non Lucrativas dirixidos a Cidadáns, á que se presentaron 34 proxectos e entre os que destacan iniciativas para colectivos específicos como son os nenos, os mozos, as persoas con discapacidades físicas e psíquicas, os habitantes do entorno rural e a poboación reclusa.
Outras categorías ás que se teñen presentados proxectos son, Proxectos de Entidades Non lucrativas destinados a Pequenas e Medianas Empresas, Micropemes e/ou autónomos, Proxectos de Entidades Públicas ou Privadas dirixidos a Pemes e Proxectos de Entidades Públicas ou Privadas destinados a cidadáns.
O vindeiro día 24 de xaneiro daranse a coñecer os nomes dos 12 finalistas desta edición dos Premios Fundetec 2007 (tres por cada categoría) mentres que os catro gañadores faranse públicos na cerimonia de entrega de premios que terá lugar o vindeiro 7 de febreiro no Museo do Traxe de Madrid.
Os catro proxectos gañadores recibirán como galardón un trofeo conmemorativo, así como un premio en metálico de 15.000 euros no caso de tratarse de entidades sen ánimo de lucro.
Na imaxe os finalistas da categoría de Mellor Proxecto de Entidade Non Lucrativa destinado a Cidadáns do pasado ano.