4G: se nada cambia, a telefonía móbil actual máis rápida do mundo
martes, 10 de setembro do 2013
- Publicidade da tecnoloxía móbil da man de Vodafone
Para
estar á última sobre tecnoloxía móbil hai que ser máis rápido
que o raio pois no eido das telecomunicacións a velocidade é
sinónimo de mobilidade, unha espiral que non remata nunca e que xira
sempre na mesma dirección: a da velocidade, capacidade que semella
ser o motor polo que se rexe todo. Na vida cotiá non hai nada que
permaneza, todo está en continuo cambio e a tecnoloxía móbil non
ía ser menos, pois sometida como está ao ritmo apresurado dos
ávidos consumidores de telefonía, a demanda do máis
e mellor fai que xa se
albisque a chamada 4G. Dende estas páxinas de
Código Cero tentaremos
explicar polo miúdo a que nos referimos cando falamos de 4G, que
achega de novo, que vantaxes ten...
Vodafone anunciou xa a
dispoñibilidade dun servizo comercial 4G a gran escala para sete
cidades españolas a partir de
maio e arestora, mentres o lector le estas liñas, ultima o
desembarco en oito máis (incluídas
A Coruña e Vigo). Axiña
se unirán á listaxe de redes LTE Orange e Yoigo, será despois do
verán. Perante este panorama de innovación no eido das
telecomunicacións, preguntaranse moitos de
nós, se cadra os que só lemos as entradiñas das informacións TIC
e sen meternos moito no miolo, que
é iso do 4G (tamén coñecido como LTE)? Pois segundo
nos conta a Wikipedia, baixo
estas siglas empregadas para referirse á cuarta xeración de
tecnoloxías de telefonía móbil atopamos a sucesora das tecnoloxías
2G e 3G, a predecesora da vindeira xeración 5G (velocidade de
descarga 10 veces máis rápida que a de 3G). A 4G está baseada ao
100% no protocolo IP, sendo un sistema de sistemas e unha rede de
redes, que se acada grazas á converxencia entre as redes de fíos e
e as redes sen fíos.
Esta tecnoloxía poderá ser empregada por módems sen fíos, móbiles
intelixentes e outros dispositivos móbiles.
A principal diferenza coas
xeracións anteriores é a capacidade para prover velocidades de
acceso maiores de 100 Mbps
en movemento e 1 Xbps
en repouso, mantendo unha calidade de servizo (QoS) de punta a punta
de alta seguridade que permitirá achegar servizos de calquera clase,
en calquera intre e lugar co mínimo custo posíbel. O 4G,
segundo as pretensións do WWRF (Wireless
World Research Forum),
é unha fusión de tecnoloxías e protocolos, non só un único
estándar, semellante a 3G, que arestora inclúe tecnoloxías como o
son GSM e CDMA. A xeito de curiosidade, dicir que a
empresa NTT DoCoMo en Xapón, foi a primeira en realizar experimentos
coas tecnoloxías de cuarta xeración, chegando aos 100 Mbps
nun vehículo a 200
quilómetros por hora. Foi
esta marca a que lanzou os primeiros servizos 4G baseados en
tecnoloxía LTE, alá por decembro de 2010 en Toquio, Nagoia e Osaca.
No resto do mundo agárdase a súa introdución no ano 2020.
Un achegamento á
tecnoloxía G: os precedentes da 4G
O
sistema de conexión da telefonía celular G viuse sometido a un
continuo cambio e evolución que foi parello á evolución
tecnolóxica dos propios teléfonos móbiles, cuxo proceso vai ligado
a xeracións de acordo aos avances achegados. Na
actualidade existen catro, lémbranos Rita Conde dende About.com.
·
Tecnoloxía 1 G ou de redes análoxicas. Falamos da primeira
xeración xurdida a finais dos anos setenta e comezos dos oitenta do
século pasado. Esta tecnoloxía -caracterizada por ser analóxica e
só para voz- introduciu o uso de múltiples celas e a capacidade de
transferir chamadas dun lugar a outro mentres o usuario viaxaba
durante a conversa, para o que a torre de cobertura enlazábase cos
sitios de células próximas para manter a comunicación. Con todo, a
transmisión destas celas era inexacta e tampouco tiña boa calidade
de son. A tecnoloxía predominante desta xeración era o Sistema
Avanzado de Telefonía Móbil (Advanced Mobile Phone System-
AMPS polas súas siglas en inglés), o cal se empregou con maior
forza nos Estados Unidos.
·
Tecnoloxía 2G ou de globalización dixital. A
diferenza da anterior, na segunda xeración todo o proceso é
dixital. Pois tanto a 1G como a 2G empregaban sistemas dixitais para
a conexión das radio bases coa rede telefónica, pero na primeira
delas a transmisión realizábase só de maneira analóxica. Na
segunda xeración, tamén se presentaron avanzados teléfonos
celulares, con dimensións máis pequenas, que se conectaban con
rapidez ao sinal das redes. Neste período, o móbil medrou en
popularidade, tamén debido á aparición dos teléfonos
prepagamento. Asemade, os usuarios contaban por primeira vez cunha
ferramenta moi eficaz para a comunicación: as mensaxes de texto SMS
(Short Message Service). Cómpre informar que estes SMS eran
posíbeis a través do Sistema Global para Comunicacións Móbiles
(Global System for Mobile Communications-GMS), hoxe o estándar
máis popular de telefonía celular no mundo, con máis de 3 billóns
de usuarios en 212 países. Logo, o servizo de mensaxes de texto
estivo dispoñíbel en todas as redes dixitais.
·
Tecnoloxía 3G ou de alta transmisión. Antes de chegar á
terceira xeración, a telefonía celular dispoñía xa de melloras
tecnolóxicas coa 2G, cuxos avances foron modificando o seu concepto.
Entón falábase de xeracións 2.5G e 2.75G, que de certo sementaron
o camiño para esta 3G, a cal como diferenza básica sobre a anterior
era a conmutación de paquetes para a transmisión de datos. Así,
coa capacidade de transmisión de voz e datos a través da telefonía
móbil, os servizos da terceira xeración permitían ao subscritor a
posibilidade de transferir tanto voz e datos nunha sinxela
comunicación telefónica ou unha videoconferencia, coma tamén
transmitir só datos (sen voz: descargas de programas, intercambio de
correos electrónicos, mensaxería instantánea...) e todo cunha
velocidade de 384 kbps que posibilitaba mesmo ver vídeos. Con esta
transmisión de datos facíase máis doado que os teléfonos
celulares de 3G tiveran acceso a conexións de Internet. Alén disto,
co desenvolvemento tecnolóxico acadado permitíase a compatibilidade
mundial e a coexistencia cos servizos móbiles coas redes de segunda
xeración. Por se isto non abondase, a 3G aumentaba o grao de
seguridade ao autenticar a rede á que se estaba conectando.
·
Tecnoloxía 4G, a velocidade. O gran chanzo tecnolóxico
que separa á cuarta xeración da 3G radica na eliminación dos
circuítos de intercambio, para empregar só as redes IP (protocolo
de Internet), é dicir, aquelas que se producen coa confluencia entre
redes de fíos e e redes sen fíos, aptas para celulares intelixentes
ou smartphones e módems sen fíos, entre outros. Todos os
datos, incluíndo a voz das chamadas, serán transmitidos por
intermedio de paquetes conmutados cunha velocidade que estará por
enriba de 1 Xbps, amais de contar cun meirande ancho de banda. Con
estes valores, a través dun teléfono móbil ou celular, poderase
obter unha perfecta recepción para a televisión high definition
ou de alta resolución. Para entendérmonos, a maior parte dos
móbiles e tablets conéctanse a redes coñecidas como "de
terceira xeración" ou 3G, un estándar con máis de dez anos de
vida que ha ir evolucionando co tempo e aumentando a capacidade de
transmisión de datos para chegar ao nivel requirido polos teléfonos
avanzados. O seu sucesor -o LTE ou 4G- amplía a capacidade de
transmisión de datos, permitindo conectarse axiña, con velocidades
que se moverán entre os 50 e os 150 Mbps. Engadir que se supón que
será máis eficiente, contribuíndo a alongar un pouco a autonomía
dos gadgets.
Outras dúbidas
arredor do 4G
Como
toda novidade,
a 4G suscita unha chea de preguntas sen resposta que dende Código
Cero
tentaremos responder. Preguntas,
por outra banda, que nós mesmos tivemos que respondernos, botando
man por exemplo dos útiles artigos publicados por Ángel
Jiménez de Luis en
Gizmodo. Unha destas
dúbidas refírese a
se a 4G está dispoñíbel neste intre, a resposta é que esta
tecnoloxía atópase
xa en moitos países e algúns dos produtos hoxe en día dispoñíbeis
teñen capacidade para conectarse a este tipo de redes. Como algúns
dos últimos iPads e iPhones, varios teléfonos de Sony, LG e
Samsung... Emporiso, para acceder a este sistema, hai que empregar
certas bandas de radio específicas e até agora non existe un acordo
sobre en que banda se deben despregar os servizos en Europa. Na
actualidade, semella haber un acordo para despregar os servizos de 4G
na banda dos 800 Mhz pero... en moitos países europeos esta banda
está encamiñada á Televisión Dixital Terrestre. Anúnciase que
esta banda ficará libre en 2014 para o uso de redes telefónicas.
Namentres, as operadoras que fornecen 4G empregan outras frecuencias
menos eficientes pero que permiten despregar xa este servizo. No caso
de Vodafone, a empresa lanza o 4G nas bandas de 1.800 e 2.600 MHz.
Pola súa banda Orange e Yoigo aproveitan tamén esas bandas e
Movistar ten algunhas experiencias piloto en parques industriais e de
negocios en 2.600 MHz tamén.
Produtos
que serán compatíbeis
coa 4G
Na
listaxe de compatibilidade coa 4G figuran: Samsung Galaxy S4, LG
Optimus G, Sony Xperia Z, HTC One, Huawei Ascend P2, Nokia Lumia 920,
Blackberry Q10, iPhone 5 e varios dos últimos modelos de iPad. Dicir
que a compatibilidade dalgúns deles dependerá da banda de radio
escollida, podendo ser precisa unha actualización de software. Como
dato a ter en conta, a oferta comercial deste servizo variará
segundo a operadora.