O2 comercializará o iPhone no Reino Unido
xoves, 5 de xullo do 2007
A operadora de telefonía móbil británica O2 anunciou o
peche dun contrato de exclusividade con Apple para a comercialización do iPhone
no Reino Unido, de xeito que os rumores que apuntaban a que Vodafone sería
o distribuidor do novo terminal en toda Europa estarían errados, xa que a
operadora británica pertence á española Telefónica.
Este anuncio coincide tamén cos rumores de que o 1 de novembro sairá o
iPhone en Alemaña da man de T-Mobile (propiedade de Deutsche Telekom), que comercializaría
os terminais a 450 euros. Á vista destas novas podería ser que Movistar fose o
operador que achegase o iPhone a España, aínda moitos indicios (como a
incorporación dunha icona de Vodafone no propio firmware do iPhone, que podería estar presente para os servizos de
roaming da norteamericana AT&T).
As medidas que casan de por vida o iPhone cunha operadora de telefonía móbil
non parece agradar a algúns usuarios, que se están a lanzar á crackear o terminal, de xeito que o
popular DVD Jon xa publicou un sistema para liberar parcialmente o
iPhone de xeito que se poden empregar as súas funcionalidades de reprodutor
multimedia e terminal con conectividade Wi-Fi, no que máis que un divorcio supón
unha separación, xa que aínda non abre as funcións de telefonía móbil a
operadores distintos de AT&T (o que podería acontecer en breve, se temos en
conta que o primeiro crackeo do
iPhone saíu en só 3 días).